संघर्ष गांगुर्डे, साम टीव्ही

सोसायटीचा सेक्रेटरी असताना मद्यपी तरुणांना इतकेच सांगितले की, दारु पिऊन सोसायटीत येऊ नका. यावरुन वाद झाला होता. मात्र या वादाचा राग होळीच्या दिवशी काढण्यात आला. मद्यपी तीन तरुणांनी एका तरुणाला मारहाण सुरु केली. मध्यस्थी करायला आलेल्या तरुणाच्या वडिलांसह सोसायटीतील एका रहिवासीयाला मारहाण करण्यात आली. या प्रकरणी टिटवाळा पोलिस ठाण्यात गुन्हा दाखल करण्यात आला. संपूर्ण घटना सीसीटीव्हीत कैद आहे. सोसायटीत गुंडगिरी करणाऱ्यांच्या विरेाधात ठोस कारवाई केली जात नसल्याचा आरोप पीडित नागरीकांनी टिटवाळा पोलिसांवर केला आहे.

टिटवाळ्यात नेप्च्यून स्वराज सोसायटी आहे. काही महिन्यापूर्वी सुरेश उपाध्यय हे या सोसायटीत सेक्रेटरी होते. एक दिवशी सोसायटीत काही रहिवासी तरुण दारु पिऊन सोसायटीत आले. त्यांनी धिंगाणा घातला. यावरुन सेक्रेटरी असल्याने उपाध्याय यांनी मद्यपी तरुणांना समज दिली. या वादानंतर संकेत जाधव या तरुणाने सुरेश उपाध्याय यांच्या गाडीची काच फोडली होती. संकेत याने या प्रकरणी माफी मागितल्याने या प्रकरणात पोलिसात तक्रार केली गेली नाही.

मंगळवारी होळी असताना संकेत जाधव, सुशांत जाधव, राहूल पाटील या तिघांनी जुन्या वादाच्या रागातून सुरेश उपाध्याय यांचा मुलगा अमन याला बोलावून घेतले. त्याला बेदम मारहाण केली. कसा बसा आमन हा तिघांच्या तावडीतून सुटला. घराजवळ आला असता तिघांनी पाठलाग केला. यावेळी अमन याचे वडिल सुरेश आणि शेजारी राहणारे शशिकांत गुप्ता हे मध्यस्थीसाठी पुढे आले. तिघांनी त्या दोघांनाही मारहाण करण्यास सुरुवात केली.

या मारहाणीत गुप्ता यांना गंभीर दुखापात झाली आहे. त्यांच्या डोक्याला सहा टाके पडले आहे. या प्रकरणात टिटवाळा पोलिस ठाण्यात गुन्हा दाखल करण्यात आला असला तरी ठोस कारवाई केली जात नसल्याचा आरोप पिडीतांनी केली आहे.