Influencers Harassed in Mumbai: बिहारींनी लाज काढली! विदेशी क्रिएटरसोबत भररस्त्यात अश्लील कृत्य, मुंबई पोलिसांनी शिकवला धडा

Influencers Harassed in Mumbai: मुंबई शहरातील धोबीघाट परिसरात परदेशी महिला पर्यटक आणि कंटेंट क्रिएटरची छेड काढल्याची घटना समोर आल्यानंतर संतापाची लाट उसळली आहे. आयनस फारिया (वय अंदाजे २८) ही पोर्तुगालची कंटेंट क्रिएटर भारत फिरण्यासाठी मुंबईत आली असताना २२ फेब्रुवारी रोजी दुपारच्या सुमारास तिच्यासोबत हा प्रकार घडला.

फारिया धोबीघाट परिसराचे शूट करत असताना दोन तरुणांनी तिच्याकडे वारंवार सेल्फी घेण्याचा आग्रह धरत तिचा पाठलाग केला. व्हायरल झालेल्या व्हिडिओमध्ये संबंधित तरुण “प्लीज, एकदा… एक सेल्फी… दोन सेकंद पण नाही लागणार…” असे म्हणत तिच्या जवळ जाण्याचा प्रयत्न करत असल्याचे दिसते. फारियाने स्पष्ट नकार दिल्यानंतरही ते काही अंतरापर्यंत तिच्या मागे गेले, हातवारे करत संवाद साधण्याचा प्रयत्न केला.

हा व्हिडिओ सोशल मीडियावर व्हायरल झाल्यानंतर मुंबई पोलिसांनी तातडीने दखल घेत फारियाशी संपर्क साधला. मेसेजद्वारे तिचा संपर्क क्रमांक आणि निवासाचा तपशील मागवून अधिकृत निवेदन नोंदवण्यात आले. फारियाने पोलिसांना पूर्ण सहकार्य करत घडलेला प्रकार सविस्तर सांगितला.

तपासादरम्यान पोलिसांनी मनखुश कुमार शर्मा (वय २६) आणि गुलशन शर्मा (वय २८) अशी दोन्ही संशयितांची ओळख पटवली. दोघेही मूळचे उत्तर भारतातील असून कामानिमित्त मुंबईत वास्तव्यास असल्याची माहिती आहे. त्यांच्याविरुद्ध भारतीय दंड संहितेच्या छेडछाड, महिलेला विनयभंग करण्याच्या उद्देशाने पाठलाग (स्टॉकिंग) आणि त्रास देणे या कलमांखाली गुन्हा दाखल करण्यात आला आहे.

पोलिसांनी मनखुश शर्मा याला अटक करून न्यायालयात हजर केले असता त्याला चार दिवसांची पोलीस कोठडी सुनावण्यात आली. दुसरा आरोपी गुलशन शर्मा हा होळीसाठी बिहार येथे गेला असताना त्यालाही अटक करण्यात आली. आरोपींकडून मोबाईल फोन जप्त करण्यात आला असून घटनेचा संपूर्ण तपास सुरू आहे.