सचिन जाधव, पुणे

पुण्यातील दौंडमधून हृदय पिळवटून टाकणारी घटना समोर आली आहे. एका ४ वर्षीय मुलाचा रोलर खाली येऊन मृत्यू झाला आहे. मृत मुलगा हा मजूर म्हणून काम करणाऱ्या एका कामगार महिलेचा असल्याचं उघड झालं आहे. सदर घटना शहरातील जनता कॉलनी भागातील सेंट सेबिस्टियन हायस्कूलच्या मागील रस्त्यावर घडली आहे. या घटनेने परिसरात भीतीचे वातावरण पसरले आहे. या दुर्घटनेत मृत झालेल्या मुलाचे नाव आर्यन जाधव असे आहे.

मिळालेल्या माहितीनुसार, शहरातील जनता कॉलनी भागातील सेंट सेबिस्टियन हायस्कूलच्या मागील रस्त्यावर डांबरीकरणाचे काम सुरु होते. या रस्त्याच्या कामासाठी काही कामगार काम करत होते. या कामगारांमध्ये एक महिला आपल्या ४ वर्षीय मुलाला घेऊन काम करत होती. यादरम्यान लवकर काम उरकण्याच्या नादात रोड रोलर चालकाने रोलर फिरवण्याचा वेग वाढवला.

या रोलर खाली सापडून आर्यन जाधव याचा जागीच दुर्दैवी मृत्यू झाला. या प्रकरणानंतर रोड रोलर चालक घटनास्थळावरुन पळून गेला. बांधकाम विभागाकडून रस्ता वाहतुकीसाठी रस्ता बंद न करता डांबरीकरण सुरू होते. या घटनेनंतर सार्वजनिक बांधकाम विभागाने डांबरीकरण करत असताना सुरक्षात्मक उपाय केले नसल्याचे समोर आले.

आर्यनच्या मृत्यूनंतर विभागाचे अधिकारी आणि कंत्राटदारांचे सुपरवायझर कामाच्या ठिकाणी फिरकले सुध्दा नसल्याचा आरोप मृत मुलाच्या पालकांनी केला आहे. प्रशासकीय अनस्तेमुळे मजुरी करणाऱ्या एका गरीब जोडप्याला आपले बाळ गमवावे लागले असून कामगार पती पत्नीवर दुःखाचा डोंगर कोसळला आहे. या घटनेनंतर परिसरातून हळहळ व्यक्त केली जात आहे. शिवाय मोलमजुरी करणाऱ्या कामगारांच्या सुरक्षिततेचा प्रश्न पुन्हा एकदा ऐरणीवर आला आहे.