संघर्ष गांगुर्डे, साम टीव्ही

कल्याण: दिवाळीत फटाके फोडल्यामुळे आग लागली होती. मात्र चार तरुणांच्या प्रसंगवधनामुळे मोठा अनर्थ टळला.कल्याणजवळील शहाड परिसरात मयूर टेलर या दुकानात फटाक्यांमुळे अचानक आग लागल्याची घटना घडली. मात्र, या आगीने विक्राळ रूप धारण करण्याआधीच चार तरुणांनी धाडस दाखवत आगीवर नियंत्रण मिळवले.

मिळालेल्या माहितीनुसार, मयूर टेलर या दुकानासमोर फटाके फोडले जात होते. त्यातील ठिणग्या दुकानात गेल्याने आग लागली. काही क्षणांतच धूर व ज्वाळा उठू लागल्या. परिसरात एकच गोंधळ उडाला. त्याचवेळी किरण मोरे आणि त्याचे तीन साथीदार कोणतीही भीती न बाळगता पुढे सरसावले. त्यांनी ग्रीलवर चढून फायर एक्सटिंग्विशर आणि बादलीतील पाण्याच्या साहाय्याने आगीवर नियंत्रण मिळवले

या प्रयत्नात किरण मोरे किरकोळ जखमी झाला असला तरी त्याच्या आणि त्याच्या सहकाऱ्यांच्या प्रसंगावधानामुळे आग शेजारील दुकानांपर्यंत पसरली नाही. दरम्यान, अग्निशमन दलानेही घटनास्थळी तातडीने पोहोचून आग पूर्णपणे विझवली. या चार तरुणांच्या धाडसाचे आणि तत्परतेचे परिसरातील नागरिकांकडून तसेच स्थानिक प्रशासनाकडून मोठ्या प्रमाणावर कौतुक होत आहे.

50 रुपये देण्यास नकार दिला अन्...

दरम्यान कल्याणच्या बिर्ला कॉलेज रोड परिसरात गुरुवारी दुपारी एक धक्कादायक घटना घडली. फक्त ५० रुपयांच्या खंडणीसाठी एका नशेखोराने स्थानिक दुकानदारावर भरदिवसा चाकूने जीवघेणा हल्ला केला. या घटनेमुळे परिसरात मोठी खळबळ उडाली असून व्यापारी वर्गात भीतीचं वातावरण निर्माण झालं आहे.

हल्लेखोर हा सराईत गुन्हेगार असून तो याआधी एमपीडीए अंतर्गत दीड वर्ष तुरुंगात होता. काही दिवसांपूर्वीच तो सुटून बाहेर आला आणि पुन्हा गुन्हेगारी मार्गावर सक्रिय झाला आहे. धक्कादायक म्हणजे ही घटना पोलिस चौकीच्या अगदी हाकेच्या अंतरावर घडली असून, त्यामुळे स्थानिक नागरिक आणि व्यापाऱ्यांमध्ये पोलिसांच्या कार्यक्षमतेबाबत प्रश्नचिन्ह निर्माण झाले आहे.