संघर्ष गांगुर्डे, साम टीव्ही

कल्याण–डोंबिवली आगामी निवडणुकांच्या पार्श्वभूमीवर शहरातील राजकारण तापलं असतानाच शिवसेनेच्या वरिष्ठ आमदारांनी भाजप नेत्यांना थेट सल्ला देत वातावरण अधिकच रंगतदार केलं आहे. आपलं घर सोडून दुसऱ्याच्या घरात गेलेल्यांना लाख लाख शुभेच्छा फोडाफोडीची सुरुवात त्यांनीच केली. एक नंबर असलेला पक्ष अशा प्रकारच्या फोडाफोडीच्या राजकारणात पडू नये,असा टोला आमदारांनी लगावला.

भाजपने आज शिंदे गटातील तीन महत्वाच्या माजी नगरसेवकांना आपल्या गोटात घेतल्याच्या पार्श्वभूमीवर हा सल्ला देण्यात आला असल्याचे बोलले जाते. याचदरम्यान त्यांनी शिवसेनेची कल्याण–डोंबिवलीतील वास्तविक ताकद अधोरेखित करत शिवसेना ही इथली मुळाशी घट्ट रोवलेली शक्ती आहे. तळागाळात आमचा मजबूत पाया आहे. फोडाफोडीने काहीच फरक पडणार नाही,असे स्पष्ट केले.

राजकीय नेत्यांच्या जाण्या–येण्याकडे फारसा भाव न देता, सत्ता आणि पदासाठी घर बदलणाऱ्या नेत्यांना त्यांनी अप्रत्यक्षपणे सुनावले. शहरातील मतदारांनी विचारपूर्वक निर्णय घेत असल्याने अशा हालचालींचा फारसा परिणाम होत नसल्याचेही त्यांनी नमूद केले. दरम्यान, या वक्तव्यामुळे शहरात नव्या चर्चांना उधाण आले असून भाजप–शिवसेना शिंदे गट यांच्यातील आगामी राजकीय लढतीचा रंग आणखी गडद होताना दिसत आहे.

भाजपमध्ये प्रवेश केलेल्या नेत्याचा शिंदे गटावर आरोप

कल्याण-डोंबिवलीतील राजकीय वातावरणात खळबळ उडवणारा आरोप समोर आलाय. मोक्काचा आरोपी कुणाल पाटील याला आमच्या पक्षातीलच लोक पाठीशी घालत आहेत. मी दोन दिवसांपासून प्रचंड दडपणाखाली होतो,असा थरारक खुलासा महेश पाटील यांनी केलाय. शिंदे गटाच्या दडपणामुळे आज भाजपमध्ये प्रवेश केल्याची घोषणा महेश पाटील यांनी केली.