डोंबिवली एमआयडीसी (Dombivli MIDC) अमूदान कंपनीमध्ये झालेल्या भीषण स्फोटामध्ये ११ जणांचा मृत्यू झाल्याची घटना ताजी असतानाच डोंबिवलीमध्ये सिलेंडरचा स्फोट झाल्याची घटना घडली आहे. चायनीज सेंटरमधील सिंलेडरचा स्फोट होऊन ९ जण जखमी झाले आहेत. सायंकाळी ५ च्या सुमारास ही घटना घडली. अग्निशमन दलाने घटनास्थळी धाव घेत आग विझवली.

मिळालेल्या माहितीनुसार, एमआयडीसीतील अमुदान या रासायनिक कंपनीत स्फोटाच्या घटनेला आठ दिवसांचाही कालावधी उलटत नाही तोवरच डोंबिवलीतील टंडन रोडवरील सिध्दी चायनीज सेंटरमध्ये आग लागून सिलेंडरचा स्फोट झाला. या स्फोटामध्ये ९ जण जखमी झाल्याची घटना सायंकाळी पाच वाजता घडली.

सिलेंडर स्फोटामध्ये जखमी झालेल्यांमध्ये ३ जणांना केडीएमसीच्या शास्त्रीनगर सामान्य रुग्णालयात तर इतर सहा जणांना नजीकच्या खासगी रुग्णालयात उपचारासाठी दाखल करण्यात आले आहे. या घटनेमध्ये ७ जण किरकोळ जखमी झालेत. तर अन्य दोघेजण गंभीर जखमी झाल्याची माहिती समोर आली आहे.

चायनीज सेंटर बंद असताना ही घटना घडली आहे. बंद सेंटरला आग लागल्याने ती विझविण्यासाठी आजूबाजूच्या वसाहतीमधील रहिवासी धावले. अशातच अचानक चायनीज सेंटरमधील सिलेंडरचा स्फोट झाला. या स्फोटामध्ये ९ जण जखमी झाले. सर्वांना तातडीने रुग्णालयात उपचारार्थ दाखल केले गेले. घटनेची माहिती मिळताच अग्निशमन दलाच्या कर्मचाऱ्यांनी घटनास्थळी धाव घेत आगीवर नियंत्रण मिळवले.