संजय गडदे, साम टिव्ही

मुंबईतील KEM रूग्णालयातून धक्कादायक घटना उघडकीस आली आहे. रूग्णालयातील डॉक्टरवर चाकूने जीवघेणा हल्ला झाल्याची घटना उघडकीस आली आहे. हा हल्ला रूग्णालयातील महिला कर्मचाऱ्याच्या भावाने केल्याची माहिती समोर आली आहे. या हल्ल्यात डॉक्टर गंभीर जखमी झाले असून, त्यांच्यावर खासगी रूग्णालयात उपचार सुरू आहेत.

मुंबईच्या परळ येथील केईएम रुग्णालयात एका डॉक्टरवर रुग्णालयातच चाकूने जीवघेणा हल्ला झाल्याची घटना समोर आली आहे. हा हल्ला रुग्णालयातील महिला कर्मचाऱ्याच्या भावाने केल्याची माहिती मिळत आहे.

मिळालेल्या माहितीनुसार, संबंधित डॉक्टर आणि ती महिला कर्मचाऱ्यांमध्ये काही वैयक्तिक संबंध असल्याचे सांगितले जात आहे. याच गोष्टीचा राग आरोपी भावाला होता. याच संतापातून त्याने थेट रुग्णालयातील डॉक्टरवर चाकूने हल्ला केला. हल्ल्यात डॉक्टर गंभीर जखमी झाले असून त्यांच्यावर सध्या केईएम रुग्णालयातच उपचार सुरू आहेत.

घटनेनंतर आरोपी आणि त्याचे दोन साथीदार घटनास्थळावरून फरार झाले. पोलिसांनी तत्काळ घटनास्थळी धाव घेतली असून भोईवाडा पोलिस ठाण्यात हत्या करण्याच्या प्रयत्नाचा गुन्हा दाखल करण्यात आला आहे. पोलिसांनी आरोपींच्या शोधासाठी सर्वत्र तपासाचं जाळं उभं केलं असून या प्रकरणामुळे रुग्णालय परिसरात तणावाचे वातावरण निर्माण झाले आहे.