सागर आव्हाड, पुणे

पुण्यातील स्वारगेट एसटी डेपोमध्ये तरुणीवर झालेल्या लैंगिक अत्याचार प्रकरणातील आरोपी दत्ता गाडेसंदर्भात धक्कादायक माहिती उघड झाली आहे. पोलिसांनी दत्ता गाडेची कुंडलीच शोधून काढली आहे. दत्ता गाडे याचे मागील दोन वर्षातील तांत्रिक रेकॉर्ड पोलिसांनी काढले आहे. त्यामध्ये दत्ता गाडेयाचा पुण्यातील स्वारगेट, शिवाजीनगर, पुणे स्टेशनच नाही तर शिरुर, अहिल्यानगर आणि सोलापूर शहरातील बसस्थानक परिसरातही मुक्त वावर असल्याचे दिसून आले आहे.

मात्र स्वारगेट बसस्थानकात तो सर्वाधिक काळ वावरत असल्याचे दिसून आले आहे. यावरून त्याने अगोदरही अशाप्रकारचे गुन्हे केले असल्याची शक्यता वर्तवली जात आहे. त्यामुळे गुन्हे शाखने गाडेच्या कृत्याला बळी पडलेल्या पीडित महिलांना तक्रार देण्यास पुढे येण्याचे आवाहन केले आहे.

पुणे शहरातील स्वारगेट, शिवाजीनगर आणि पुणे स्टेशन ही नेहमी गर्दीने गजबजलेली बस स्थानके आहेत. दिवस-रात्र येथे प्रवाशांची वर्दळ असते. त्याच संधीचा फायदा घेत गाडे गुन्हेगारी कृत्य करत असल्याचा पोलिसांचा अंदाज आहे. त्यामुळे पोलिसांनी दत्ता गाडेची कुंडली काढण्यास सुरूवात केली आहे.

दरम्यान या प्रकरणातील आरोपी दत्ता गाडेच्या डीएनए अहवाल आणि न्यायवैद्यक पुरावे एकत्रित करून साधारण १५ दिवसांत न्यायालयात आरोपपत्र दाखल करण्यात येणार आहे. या प्रकरणात तरुणीसह तिचे कुटुंबीय आणि मित्राचा जबाब नोंदविण्यात आला आहे. पीडित तरुणी स्वारगेट परिसरात ज्या वाहनाने आली त्या कॅबचालक आणि संबंधित शिवशाही बसच्या वाहकाचाही जबाब घेण्यात आला आहे.

स्वारगेट अत्याचार प्रकरणात घटनास्थळावरील सीसीटीव्ही चित्रिकरण, ससून रुग्णालयाकडून प्राप्त वैद्यकीय चाचणी अहवाल, बसच्या न्यायवैद्यक तपासणीचा अहवाल अशा पुराव्यांचा आरोपपत्रात समावेश असेल. या गुन्ह्याच्या तपासात कोणत्याही त्रुटी राहणार नाहीत. तरुणीला न्याय मिळवून देण्यासाठी सुटसुटीत आणि न्यायवैद्यक पुराव्यानिशी आरोपपत्र दाखल करण्यात येणार आहे, असे गुन्हे शाखेकडून स्पष्ट करण्यात आले आहे.