मध्य रेल्वेने मुंबई विभागात रविवारी मेगाब्लॉकची घोषणा केली आहे. विविध अभियांत्रिकी आणि देखभाल दुरुस्ती कामांसाठी उपनगरीय मार्गांवर मेगाब्लॉक घेण्यात येणार आहे. मुख्य मार्ग आणि हार्बर मार्गावर या मेगाब्लॉक असणार आहे.

मुख्य मार्गावर कसा असेल मेगाब्लॉक?

ठाणे ते कल्याण स्थानकांदरम्यान अप आणि डाऊन जलद मार्गावर १०.४० ते १५.४० वाजेपर्यंत ब्लॉक राहणार आहे. छत्रपती शिवाजी महाराज टर्मिनस मुंबई येथून ०९.३४ ते १५.०३ दरम्यान सुटणाऱ्या डाऊन जलद /अर्ध-जलद लोकल सेवा ठाणे ते कल्याण दरम्यान डाऊन धीम्या मार्गावरून वळविण्यात येणार आहेत.

मेगाब्लॉकमुळे लोकल ट्रेन कळवा, मुंब्रा आणि दिवा स्थानकांवर थांबतील. त्यानंतर सुमारे १० मिनिटे उशिरा गंतव्यस्थानी पोहोचतील. कल्याण येथून १०.२८ ते १५.४० दरम्यान सुटणाऱ्या अप जलद/ अर्ध-जलद लोकल सेवा कल्याण ते ठाणे दरम्यान अप धीम्या मार्गावरून वळविण्यात येणार आहे. त्यामुळे लोकल या दिवा, मुंब्रा आणि कळवा स्थानकांवर थांबतील.

तर पुढे मुलुंड स्थानकात अप जलद मार्गावर पुन्हा वळवण्यात येणार आहे. त्यामुळे ट्रेन १० मिनिटे उशिराने स्टेशनला पोहोचतील. छत्रपती शिवाजी महाराज टर्मिनस मुंबई / दादर येथून सुटणाऱ्या डाऊन मेल/ एक्सप्रेस गाड्या ठाणे ते कल्याण दरम्यान ५व्या मार्गावरून वळवण्यात येतील.

हार्बर मार्गावर कसं असेल वेळापत्रक?

कुर्ला ते वाशी स्थानकांदरम्यान अप व डाऊन हार्बर मार्गावर ११.१० ते १६.१० वाजेपर्यंत ब्लॉक राहील. छत्रपती शिवाजी महाराज टर्मिनस मुंबई येथून सकाळी १०.३४ ते दुपारी १५.३६ दरम्यान वाशी / बेलापूर / पनवेल कडे जाणाऱ्या डाऊन हार्बर मार्गावरील सेवा तसेच पनवेल / बेलापूर / वाशी येथून १०.१७ ते १५.४७ दरम्यान छत्रपती शिवाजी महाराज टर्मिनस मुंबई कडे येणाऱ्या अप हार्बर मार्गावरील सेवा रद्द राहतील.

ब्लॉक कालावधीत छत्रपती शिवाजी महाराज टर्मिनस मुंबई – कुर्ला तसेच पनवेल – वाशी विभागात विशेष उपनगरीय लोकल सेवा चालवण्यात येणार आहे. हार्बर मार्गावरील प्रवाशांना ब्लॉक कालावधीत १०.०० ते १८.०० या वेळेत ठाणे – वाशी / नेरूळ स्थानकांदरम्यान प्रवास करण्याची परवानगी देण्यात आलीये.