महाराष्ट्रातील २९ महानगरपालिका निवडणुकांचे निकाल जाहीर होऊ लागले आहेत. मुंबई महापालिका निवडणुकीचे निकाल देखील जाहीर होऊ लागले आहेत. महापालिकांच्या निकालामध्ये भाजपचं वर्चस्व पाहायला मिळत आहे. यामुळे भाजप आणि शिंदे गटामध्ये आनंदाचं वातावरण पाहायला मिळत आहे. दुसरीकडे मुंबईत ठाकरे गट २५ वर्षांची सत्ता गमावताना दिसत आहे. यादरम्यान ठाकरे बंधूंना मोठा झटका बसल्यानंतर भाजप खासदार निशिकांत दुबे यांनी मोठं आव्हान दिलं आहे.

मुंबईत भाजपने सत्ता काबिज करण्याकडे वाटचाल करताच खासदार निशिकांत दुबे यांनी ठाकरे बंधूंवर टीका करणे सुरू केले आहे. निशिकांत दुबे यांनी 'एक्स'वर पोस्ट करत ठाकरे बंधूंवर टीका केली. खासदार निशिकांत दुबे यांनी ठाकरेंच्या घराणेशाहीला लक्ष्य केलं आहे. मी मुंबईत येऊन उद्धव आणि राज ठाकरेंना भेटणार असल्याचते दुबेंनी आव्हान दिलं.

राज ठाकरेंनी केली होती खासदार दुबेंवर टीका

मनसे अध्यक्ष राज ठाकरे यांनी मराठी भाषेवरून मनसैनिकाने अमराठी दुकानदाराला केलेल्या मारहाणीचं समर्थन केलं होतं. त्यानंतर भाजप खासदार निशिकांत दुबे यांनी राज ठाकरेंवर टीका केली होती. 'हिमंत असेल तर उर्दू किंवा दक्षिण भारतीय भाषिकांना मारून दाखवा. उत्तर प्रदेश किंवा बिहारमध्ये आल्यानंतर आपटून आपटून मारू, असं आव्हान खासदार दुबेंनी दिलं होतं. याच दुबे यांनी मुंबई आणि महाराष्ट्रातील अनेक महापालिकांवर भाजप आघाडीवर येत असताना ठाकरे बंधूंना लक्ष्य केलं आहे. भाजप खासदाराच्या टीकेला ठाकरे बंधू्ंकडून काय प्रत्युत्तर दिले जाते, हे पाहावे लागेल.

तत्पूर्वी, मुंबईत महायुती १२५ जागांवर आघाडीवर आहे. तर मुंबईत सत्तास्थापनेसाठी बहुमत आकडा ११४ इतका आहे. ठाकरे बंधू ७५ जागांवर आघाडीवर आहेत. तर काँग्रेस १५ जागांवर आघाडीवर असल्याची माहिती मिळत आहे. पालिकेचा अधिकृत निकाल येण्याआधी खासदार दुबे यांनी ठाकरे बंधूंना आव्हान दिलं आहे.