Mumbai News : आगामी लोकसभा निवडणुकीच्या पार्श्वभूमीवर विरोधकांनी भाजपविरोधात एकजूट केली आहे. याच निमित्ताने आज काँग्रेस, राष्ट्रवादी काँग्रेस, ठाकरे गट, तृणमूल काँग्रेस, द्रमुक, जेडीयू, राजद आणि आपसह अनेक पक्षांच्या नेत्यांची पाटणा येथे बैठक होणार आहे. बिहारचे मुख्यमंत्री नितीश कुमार यांनी या बैठकीचे आयोजन केले आहे.

या बैठकीसाठी राज्यातून शरद पवार, सुप्रिया सुळे, उद्धव ठाकरे, आदित्य ठाकरे रवाना झाले आहे. यावरुन भाजपचे प्रदेशाध्यक्ष चंद्रशेखर बावनकुळे यांनी पवार आणि ठाकरेंसह विरोधकांवरु सडकून टीका केली आहे. (Latest Marathi News)

विरोधक स्वतःच हित जपण्यासाठी एकत्र

एकीकडे पंतप्रधान नरेंद्र मोदी अमेरिकेत जाऊन देशाची मान उंचावत आहेत. तर दुसरीकडे मोदींच्या विरोधात गळा काढण्यासाठी विरोधक आज पाटण्यात एकत्र येत आहेत. मोदींना देशहिताची चिंता आहे तर विरोधक स्वतःच हित जपण्यासाठी एकत्र आले आहेत, अशी टीका चंद्रशेखर बावनकुळेंनी केली आहे.

पोराबाळांच्या भविष्यासाठी विरोधक एकवटले

एकत्र आलेल्या विरोधकांना जनतेची नाही तर आपल्या मुलांची चिंता आहे. सोनिया गांधी राहुल गांधींना पंतप्रधान करु इच्छितात, शरद पवार यांना सुप्रिया सुळे यांची चिंता आहे. उद्धव ठाकरे यांना आदित्य ठाकरेंचं भविष्य दिसतंय. त्यामुळे आपल्या पोराबाळांच्या भविष्यासाठी विरोधक एकवटले आहेत, असा टोला बावनकुळे यांनी लगावला. (Latest News)

जनता मोदीजींनाच साथ देणार

देशातील जनता या विरोधकांचा डाव ओळखून आहे. २०१९ सालीही जनतेनं मोदीजींवर विश्वास टाकत फक्त आपल्या कुटुंबाचं हित बघणाऱ्या विरोधकांना घरी बसवलं होतं. आता २०२४ मध्येही जनता मोदीजींची साथ देणार आहे, असा विश्वासही बावनकुळे यांनी व्यक्त केला.