Summary -

• अंबरनाथमध्ये मोठा राजकीय भूकंप

• काँग्रेसचे १२ नगरसेवक भाजपमध्ये दाखल

• काँग्रेस पक्षाला स्थानिक पातळीवर मोठा धक्का

• रवींद्र चव्हाण आणि गणेश नाईक यांच्या उपस्थितीत प्रवेश

• नगरपरिषदेत राजकीय समीकरणे बदलली

अंबरनाथमधील काँग्रेसमधून निलंबित करण्यात आलेल्या १२ नगरसेवकांनी भाजपमध्ये प्रवेश केला. भाजपचे प्रदेशाध्यक्ष रविंद्र चव्हाण आणि गणेश नाईक यांच्या उपस्थितीत या सर्वांनी भाजपचे कमळ हाती घेतले. या पक्ष प्रवेशामुळे काँग्रेसला मोठा धक्का बसला. अंबरनाथ नगरपरिषदेमध्ये विजयी झाल्यानंतर काँग्रेसच्या या सर्व १२ नगरसेवकांनी भाजपसोबत युती केली होती. त्यानंतर पक्षाकडून त्यांच्याविरोधात निलंबनाची कारवाई करण्यात आली होती.

काँग्रेस पक्षाकडून निलंबनाची कारवाई केल्यानंतर या नगरसेवकांनी भाजपमध्ये जाण्याचा निर्णय घेतला. या नगरसेवकांनी काँग्रेसला सोडचिठ्ठी देत आज नवी मुंबईमध्ये भाजपमध्ये प्रवेश केला. घडलं असं की, काँग्रेसमुक्त भारतच्या घोषणा देणाऱ्या भाजपसोबत काँग्रेसने अंबरनाथ नगरपरिषदेत हातमिळवणी केली होती. या नगरपरिषदेत विजयी झालेल्या १२ नगरसेवकांनी परस्पर युती करण्याबाबतचा निर्णय घेतला होता.

काँग्रेसच्या या १२ नगरसेवकांनी घेतलेला निर्णय पक्षशिस्तीचा भंग करणारा असल्याने काँग्रेसचे प्रदेशाध्यक्ष हर्षवर्धन सपकाळ यांनी या नगरसेवकांची पक्षातून हकालपट्टी केली. अंबरनाथच्या प्रदीप पाटील यांच्यासह १२ नगरसेवकांचे काँग्रेसमधून निलंबन करण्यात आले होते. त्यानंतर या नगरसेवकांनी काँग्रेस सोडत भाजपमध्ये प्रवेश केला.

प्रदेशाध्यक्ष रवींद्र चव्हाण, मंत्री गणेश नाईक, संजीव नाईक, दीपेश म्हात्रे यांच्या प्रमुख उपस्थितीमध्ये या सर्व नगरसेवकांनी भाजपचे कमळ हाती घेतले. यावेळी रवींद्र चव्हाण यांनी या सर्व नगरसेवकांचे पक्षात स्वागत केले. भाजपमध्ये प्रवेश करण्यापूर्वी कोणताह दगा फटका होऊ नये यासाठी काँग्रेसच्या १२ नगरसेवक अज्ञातस्थळी नेण्यात आले होते.

या १२ नगरसेवकांनी केला भाजपमध्ये प्रवेश -

१) प्रदीप नाना पाटील

२) दर्शना उमेश पाटील

३) अर्चना चरण पाटील

४) हर्षदा पंकज पाटील

५) तेजस्विनी मिलिंद पाटील

६) विपुल प्रदीप पाटील

७) मनीष म्हात्रे

८) धनलक्ष्मी जयशंकर

९) संजवणी राहुल देवडे

१०) दिनेश गायकवाड

११) किरण बद्रीनाथ राठोड

१२) कबीर नरेश गायकवाड