बदलापुरात पुन्हा एकदा चिमुकलीवर अत्याचाराची धक्कादायक घटना घडलीय. स्कूल व्हॅनमध्ये एका चार वर्षाच्या चिमुकलीवर अत्याचार झालाय. बदलापूर पश्चिमेकडे ही घटना घडलीय. पोलिसांनी आरोपी वाहन चालकाला अटक केली असून गुन्हा दाखल केलाय.

बदलापूर पश्चिमेकडील एका खाजगी शाळेत चार वर्षांची चिमुकली शिकत होती. ती नेहमीप्रमाणे दुपारी 12.30 वाजेपर्यंत स्कूलव्हॅन मधून घरी न परतल्यामुळे तिच्या आईने व्हॅन चालकाकडे फोन करून विचारणा केली. त्यानंतर साधारण दीड तासानंतर चिमुकली घरी आली. ती अत्यंत भेदरलेल्या अवस्थेत होती. तिच्या आईने तिच्याकडे विचारणा केली असता तिने घडलेला प्रकार आईला सांगितला.

आरोपीने चिमुकलीच्या गुप्तांगाला हात लावल्याचं तिने आपल्या आईला सांगितलं. त्यानंतर चिमुकलीच्या पालकांनी तत्काळ पोलीस स्टेशनमध्ये धाव घेतली. पोलिसांनी व्हॅन चालकाला अटक केली असून गुन्हा दाखल केलाय. पोलिसांनी आरोपीला अटक करून पुढील कारवाईला सुरुवात केली आहे. घटनेनंतर बदलापूर अत्याचार प्रकरणात फॉरेन्सिक टीम दाखल झाली आहे. ही टीम आरोपी व्हॅनचालकाची तपासणी करणार आहे.

चिमुकलीवरील अत्याचाराचा प्रकार समजताच राष्ट्रवादी अजित पवार पक्षाच्या महिला कार्यकर्त्यांनी बदलापूर पश्चिमेकडील पोलीस स्टेशनमध्ये धाव घेतली. तसंच राष्ट्रवादीच्या संगीता चेंदवणकर यांनी स्कूल व्हॅनवर दगड भिरकावला. बदलापुरात पुन्हा एकदा चिमुकलीवर अत्याचाराची घटना घडल्यामुळे संतापाची लाट उसळलीय.

तत्पूर्वी, बदलापुरात काही महिन्यांपूर्वी नामांकित शाळेत चिमुकलीवर अत्याचाराची घटना घडली होती. चिमुकलीवर अत्याचाराची घटना घडल्यानंतर सर्वत्र एकच संतापाची लाट उसळली होती. बदलापूरकरांनी लोकल ट्रेन रोखून ठेवल्या होत्या. या घटनेतील मुख्य आरोपीचा पोलिसांनी एन्काउंटर केला होता. त्यानंतर आज झालेल्या प्रकरणात आरोपीवर कठोर कारवाईची मागणी बदलापूरकर करत आहेत.