Mumbai News: बाबरी मशिदीबाबत (Babri Masjid) भाजपचे नेते चंद्रकांत पाटील (BJP Leader Chandrakant Patil) यांनी केलेल्या वक्तव्यानंतर संतप्त झालेले माजी मुख्यमंत्री उद्धव ठाकरे (Uddhav Thackeray) यांनी आज पत्रकार परिषद घेतली. या पत्रकार परिषदेत त्यांनी थेट भाजपसोबत मुख्यमंत्री एकनाथ शिंदे (CM Eknath Shinde) यांच्यावर जोरदार निशाणा साधला. 'सत्तेसाठी लाचारी करणारे मिंधे यांनी चंद्रकांत पाटलांचा राजीनामा घ्यावा. नाही तर स्वत: राजीनामा द्यावा', अशी मागणी उद्धव ठाकरे यांनी केली.

भाजपचे नेते चंद्रकांत पाटील यांनी सोमवारी बाबरी मशीदीबाबत (babri masjid demolition) मोठं वक्तव्य केलं. 'बाबरी पाडण्यात शिवसेना आणि बाळासाहेब ठाकरे यांची भूमिका नव्हती.', असे ते म्हणाले होते. त्यांच्या या वक्तव्यानंतर राजकारण चांगलेच तापले आहे.

याप्रकरणी संतप्त झालेल्या उद्धव ठाकरे यांनी आज पत्रकार परिषद घेत चंद्रकांत पाटील यांच्यासोबत भाजप आणि मुख्यमंत्री एकनाथ शिंदे यांना खडेबोल सुनावले आहेत. 'गोमुत्रधरी चंद्रकांत पाटील हे बाबरीच्या आठवणीच्या खंडकातून बाहेर पडले. जेव्हा बाबरी पाडली तेव्हा सगळे उंदीर बिळात होते. पण आता हे सगळे उंदीर बाहेर पडू लागले आहेत.' असा टोला त्यांनी चंद्रकांत पाटलांना लगावला.

यावेळी उद्धव ठाकरे यांनी चंद्रकांत पाटलांचा राजीनामा घ्या नाहीतर मुख्यमंत्र्यांनी स्वत: राजीनामा द्यावा, अशी मागणी केली. 'सत्तेसाठी लाचारी करणारे मिंधे यांनी चंद्रकांत पाटलांचा राजीनामा घ्यावा. बावनकुळे वगैरे माझ्या खिजगिनतीत पण नाही. चंद्रकांत पाटील बोलले आहेत. श्रेयवादाचा प्रश्नच नाही. पाटलांची हकालपट्टी व्हायला हवी.' अशी मागणी यावेळी त्यांनी केली. तसंच, सहन होत नाही आणि सांगता येत नाही अशी भाजपची अवस्था झाली असल्याची टीका देखील त्यांनी केली.

तंसच, उद्धव ठाकरे यांनी यावेळी मुख्यमंत्री एकनाथ शिंदेंवर देखील निशाणा साधला. 'राम मंदिराचा निकाल कोर्टाने दिला आणि त्याचे श्रेय भाजप घेत आहे. बाळासाहेबांचा ऐवढा अपमान कधी झाला नव्हता. बाळासाहेबांचा अपमान करणाऱ्या भाजपसोबत आणखी किती दिवस राहणार आहात.', असा सवाल त्यांनी एकनाथ शिंदेंना केला

तसंच, 'भाजपसोबत राहत असाल तर मिंधेंना बाळासाहेबांचे आणि शिवसेनेचे पवित्र नाव घेण्याचा अधिकार नाही. त्यांनी बाळासाहेबांचा फोटो पण वापरु नये.', असे त्यांनी सांगितले. त्यासोबतच, 'बाळासाहेबांचे शिवसैनिक म्हणवणारे कुणाला जोडे मारणार आहेत? की स्वतः च स्वतःला जोडे मारणार आहेत?.', असा सवालही त्यांनी यावेळी एकनाथ शिंदेंना केला.