राष्ट्रवादी काँग्रेस शरद पवार गटाचे खासदार अमोल कोल्हे यांनी नाशिक दौऱ्यावर असताना त्यांनी मुख्यमंत्री देवेंद्र फडणवीस यांना इन्फ्रामॅन अशी उपमा देत कौतुक केल्याने राजकीय वर्तुळात अनेकांच्या भुवया उंचावल्या होत्या. तसेच सत्ताधाऱ्यांकडून ऑफर आल्यास विचार करू असे विधान केल्याने ऑपरेशन तुतारीबाबत चर्चा सुरू झाल्या होत्या. मात्र त्यांनी पत्रकार परिषद घेत आपण शरद पवार यांच्यासोबत सांगून ह्या चर्चाना पूर्णविराम लावला होता. अशातच आज त्यांनी एक पोस्ट करत त्यांच्या मनात नेमके चालले काय? असा प्रश्न उपस्थित होत आहे.

पुणे जिल्ह्यातील शिरूरचे खासदार डॉ. अमोल कोल्हे यांनी सोशल मीडियावर मोठी घोषणा करणार अशी पोस्ट शेअर करताच राज्याच्या राजकीय वर्तुळात पुन्हा चर्चांना उधाण आलंय. गेल्या दोन दिवसांपासून त्यांच्या राजकीय भूमिकेबाबत विविध तर्क-वितर्क रंगत असतानाच, आता ही घोषणा नेमकी राजकारणाशी संबंधित असेल की त्यांच्या नव्या ऐतिहासिक मालिकेबाबत, याचीही जोरदार चर्चा सुरू झाली आहे.

गेल्या दोन दिवसांत डॉ. अमोल कोल्हे यांच्या एका वक्तव्यानंतर ते महायुतीत जाणार का, अशा चर्चांना वेग आला होता. त्यानंतर पत्रकार परिषद घेऊन आपण शरद पवार यांच्या नेतृत्वासोबतच ठामपणे असल्याचं स्पष्ट करत त्यांनी पक्षांतराच्या चर्चांना पूर्णविराम देण्याचा प्रयत्न केला. मात्र, त्यानंतर आता “मोठी घोषणा करणार…” अशी सोशल मीडिया पोस्ट समोर आल्याने पुन्हा एकदा उत्सुकता वाढली आहे. दरम्यान, अभिनय क्षेत्रातही सक्रिय असलेल्या अमोल कोल्हेंची एखादी नवी ऐतिहासिक मालिका किंवा कलाकृती जाहीर होण्याची शक्यताही व्यक्त केली जात आहे. त्यामुळे ही घोषणा राजकीय आहे की मनोरंजन क्षेत्राशी संबंधित, याचा उलगडा त्यांच्या अधिकृत घोषणेनंतरच होणार आहे.