Summary -

• अंबरनाथमध्ये तरुणावर जीवघेणा हल्ला झाल्याची घटना घडली

• कोयता आणि तलवारीने तरुणावर वार करण्यात आले

• ९ जणांच्या टोळीने तरुणावर हल्ला केला

• या हल्लात तरुण गंभीर जखमी झाला असून त्याच्यावर रुग्णालयात उपचार सुरू आहेत

• हल्ल्याची ही घटना सीसीटीव्ही कॅमेऱ्यात कैद झाली असून व्हिडीओ व्हायरल होत आहे

अजय दुधाणे, अंबरनाथ

अंबरनाथ शहरात पुन्हा एकदा गुंडगिरीचे साम्राज्य डोकं वर काढताना दिसत आहे. जावसई परिसरात सोमवारी रात्रीच्या सुमारास एका तरुणावर ८ ते ९ जणांच्या टोळीने तलवार–कोयत्यांसारख्या धारदार शस्त्रांनी प्राणघातक हल्ला केल्याची धक्कादायक घटना समोर आली आहे. या हल्ल्यात तरुण गंभीर जखमी झाला असून त्याच्यावर रुग्णालयात उपचार सुरू आहेत. ही घटना सीसीटीव्हीत कैद झाली असून त्याचा थरकाप उडवणारा व्हिडीओ व्हायरल होत आहे.

अंबरनाथच्या फुलेनगर वाडीमध्ये सुधीर ओमप्रकाश सिंह हा तरुण आपल्या कुटुंबासोबत राहतो आणि या परिसरात त्याचा तबेलाही आहे. गाडीच्या तुटलेल्या पार्टचे वेल्डिंगचे काम करण्यासाठी तो घराजवळील गॅरेजवर गेला असताना अचानक मोटरसायकलवरून आलेल्या ९ तरुणांनी त्याच्यावर प्राणघातक हल्ला केला. आरोपींकडे तलवार, कोयता यासारखी घातक हत्यारे होती आणि त्यांनी थेट जीव घेण्याच्या उद्देशाने सुधीरला मारहाण करत कोयता-तलवारीने हल्ला केला.

या हल्ल्यात सुधीर सिंह यांच्या पाठीवर, हातावर आणि पायावर गंभीर जखमा झाल्या असून त्यांना तात्काळ उल्हासनगरच्या मध्यवर्ती रुग्णालयात उपचारासाठी दाखल करण्यात आले. हल्लेखोरांनी पळ काढताना सुधीरची मोटरसायकलची सुद्धा तोडफोड केली. ही संपूर्ण घटना सीसीटीव्ही कॅमेऱ्यात स्पष्ट दिसून आली आहे. याप्रकरणी अंबरनाथ पश्चिम पोलिस ठाण्यात गुन्हा दाखल करण्यात आला असून पोलिसांनी हल्लेखोरांच्या टोळीचा शोध सुरू केला आहे. शहरातील वाढत्या गुंडगिरीमुळे नागरिकांमध्ये भीतीचे वातावरण आहे.