संजय गडदे, साम टीव्ही

हिंदी सक्तीच्या विरोधात विरोधी पक्षांनी आक्रमक भूमिका घेतली आहे. मुंबईत हिंदी सक्तीच्या विरोधात ठाकरे बंधूंचा एकत्र मोर्चा ५ जुलै रोजी निघणार आहे. ठाकरे बंधूंच्या मोर्च्याला विविध पक्ष आणि नेत्यांकडून पाठिंबा मिळत आहे. ठाकरे बंधूच्या आक्रमक भूमिकेमुळे महायुती सरकारचं टेन्शन वाढलं आहे. याच हिंदी सक्तीवरून आदित्य ठाकरे यांनी भाजपवर निशाणा साधला आहे.

आदित्य ठाकरे धारावी दौऱ्यावर आले होते. या दौऱ्यादरम्यान आदित्य ठाकरे यांनी भाजपवर टीका केली होती. आदित्य ठाकरे म्हणाले, 'धारावीतील लोक आहेत, ते भेटायला आले होते. या लोकांनी शासनावर विश्वास ठेवून सर्वेक्षण करू दिले. पहिल्याच यादीत हे अपात्र ठरले. या सर्व्हे ८० टक्के लोकांना अपात्र ठरवून कचऱ्याच्या ढिगाऱ्यावर पाठवणार आहे. मुंबईसाठी आम्ही लढत राहू. अदानी यांनी कोणतंही पाऊल उचलू द्या. मी जेव्हा अदानींवर बोलतो, तेव्हा मला ट्रोल केले जातं. पण भाजपवर बोललो तर ट्रोल केले जात नाही. जिथे आहे, तिथेच लोकांना घर मिळालं पाहिजे'.

'जगातील सर्वात मोठा जमीन घोटाळा धारावी असू शकतो. भाजपचा हा घोटाळा आम्ही करू देणार नाही. आता ते आमदार कुठे आहेत, जे गुवाहाटीला जाण्यासाठी पुढे पुढे होते, आता कुठे आहे. हिंदीची सक्ती नसावी. राज्यात तोडो फोडून राजकारण सुरू आहे, त्याविरोधात आम्ही एकत्र येऊ. भाजपमध्ये मराठी माणूस आहेत, त्यांनी पुढे यावे. अहवाल येणे एक गोष्ट आहे आणि तज्ञांकडे जाणे एक गोष्ट आहे. आम्ही जीआर काढला आहे का? असा सवाल आदित्य ठाकरे यांनी केलं आहे.

'मुंबईचं कोस्टल रोड आमचे स्वप्न होते. पुढच्या कामाचे टप्पे आम्ही दाखवले होते. आम्ही ८० टक्के काम केले. समृद्धीत खड्डे पडले, त्यामुळे त्यांना गुजरातला जावे लागले. कॉस्ट एस्क्लेशनकरून कोस्टलचे बांधकाम केले आहे, असे ठाकरे पुढे म्हणाले. उत्तर भारतीय विकास सेनेचे सुनील शुक्लानं मुंबईत उत्तर भारतीय महापौरासाठी गणित मांडलं. त्यावर आदित्य ठाकरे यांनीही भाष्य केलं. 'ही संघटना कोणाशी निगडित आहेत, हे पाहिले पाहिजे. यामागे भाजप आहे का, हे आधी तपासले पाहिजे'.