Wardha News : दूधाचे उपकार फेडले! एकाच्या साथीने १५ वर्षांच्या मुलाने वाचवला पुरात अडकलेल्या आईचा जीव, वाचा घटनेचा थरार

चेतन व्यास, साम टीव्ही

Wardha News : शेतातून घरी परतत असताना एका महिलेचा पाय नाल्यावरून जाताना अचानक घसरला. त्यानंतर महिला पुराच्या पाण्यात वाहू लागली. हे लक्षात येताच एका व्यक्तीने तात्काळ नाल्यात उडी घेतली. आईला बुडताना पाहून तिचा १५ वर्षांचा मुलगाही मदतीसाठी धावला. अखेर मोठ्या प्रयत्नांनंतर महिलेला वाचवण्यात यश आलं. ही घटना वर्धा तालुक्यातील दहेगाव गावंडे येथे घडली.

वर्ध्यातील दहेगाव (गावंडे) येथील मारोती नेहारे यांच्या शेतात सुनंदा नागोसे, मैना नेहारे आणि रोशनी भलावी शेतात गेल्या होत्या. काम आटोपून दुपारी त्या घरी परतत होत्या. शेताच्या कुंपणाशेजारी वाहणारा नाला जोरात वाहत होता. यावेळी मजूर महिला मैना नेहारे, सुनंदा नागोसे आणि रोशनी भलावी तिघी मागे राहिल्या.

नाला ओलांडताना मैना नेहारेचा पाय घसरला. त्यानंतर नेहा पुराच्या पाण्यात वाहू लागली. रोशनी भलावीने तात्काळ मैना नेहारेचा हात पकडला. मात्र दोघीही वाहू लागल्या. हे पाहून सुनंदा नागोसेही मदतीसाठी धावली. पण तीही पाण्याच्या प्रवाहात अडकली.

तिघी महिलांना पाण्यात वाहताना पाहून हनुमान उइके या व्यक्तीने मदतीसाठी धाव घेतली आणि तात्काळ नाल्यात उडी मारली. आईला बुडताना पाहून सुनंदा नागोसेचा १५ वर्षांचा मुलगाही धावत आला. नाल्यात वाहणाऱ्या पाण्यात हनुमान उइके आणि सुनंदाचा मुलगा यांनी मिळून तिन्ही महिलांना वाचवले.

पुराच्या पाण्यात अडकलेल्या दोन शेतकऱ्यांचा वाचवला जीव

वाशिमच्या जोगेश्वरी परिसरात पुराच्या पाण्यात अडकलेल्या दोन शेतकऱ्यांना प्रशासनाने रेस्क्यू केलं. दोघे शेतकरी दुपारपासून पुरात अडकून पडले होते. प्रशासनाला माहिती मिळाल्यानंतर रेस्क्यू टीमने गावात दाखल झालं. त्यानंतर या शेतकऱ्यांना पुरातून बाहेर काढले. जोगेश्वरी परिसरात मोठ्या प्रमाणात पाऊस झाल्यानं नदीला पूर आला होता. यापुरात शेतीचही मोठ्या प्रमाणात नुकसान झालं. शेतकऱ्यांनी नुकतीच पेरणी केलेली पीकंही वाहून गेलेत.