• महिला महसूल अधिकारी लाच घेताना अटक

• पालघरमध्ये एसीबीची मोठी कारवाई

• महसूल विभागातील भ्रष्टाचार प्रकरण समोर

• वसई- विरार लाचलुचपत कारवाई

मनोज तांबे, वसई

पालघरमधून एक मोठी बातमी समोर आली आहे. महसूल अधिकाऱ्याला लाच घेताना पोलिसांनी अटक केली. ४५ हजारंची लाच घेताना महिला अधिकाऱ्याला रंगेहाथ पकडण्यात आले. सध्या लाच लुचपत प्रतिबंधक विभागाकडून त्यांची चौकशी सुरू आहे. या कारवाईमुळे महसूल विभागात एकच खळबळ उडाली आहे.

मिळालेल्या माहितीनुसार, लाचलुचपत प्रतिबंधक विभागाने पेल्हार ग्रामपंचायतच्या ग्राम महसूल अधिकारी उज्वला प्रवीण पाटील यांना ४५ हजार रुपयांची लाच स्वीकारताना रंगेहाथ अटक केली. सोमवार ही कारवाई करण्यात आली आहे. या कारवाईमुळे महसूल विभागात मोठी खळबळ उडाली आहे. सध्या उज्वला प्रवीण पाटील यांची चौकशी केली जात आहे.

लाचलुचपत प्रतिबंधक विभागाने दिलेल्या माहितीनुसार, तक्रारदाराने केलेल्या रूम बांधकामाचा पंचनामा न करण्यासाठी उज्वला पाटील यांनी ४५ हजार रुपयांची मागणी केली होती. तसेच मौजे बिलालपाडा येथील सर्व्हे क्रमांक १३/०३ या जमिनीवर करण्यात आलेल्या माती भरणीच्या पंचनाम्यासंदर्भात १ लाख ५० हजार रुपयांची मागणी करण्यात आली होती. अशाप्रकारे एकूण १ लाख ९५ हजार रुपयांची लाच मागण्यात आल्याचे तपासात निष्पन्न झाले आहे.

तक्रारदाराने याबाबत एसीबीकडे तक्रार दाखल केल्यानंतर विभागाने पडताळणी करून सापळा रचला. त्यानुसार लाचेच्या रकमेचा पहिला हप्ता म्हणजे ४५ हजार रुपये स्वीकारताना एसीबीच्या पथकाने उज्वला प्रवीण पाटील यांना रंगेहाथ पकडले.

याप्रकरणी पेल्हार पोलिस ठाण्यामध्ये भ्रष्टाचार प्रतिबंधक कायदा १९८८ (सुधारित अधिनियम २०१८) कलम ७ अन्वये गुन्हा दाखल करण्याची प्रक्रिया सुरू आहे. वसई-विरार शहर परिसरातील ग्रामपंचायती तसेच तलाठी कार्यालयांमध्ये या कारवाईची जोरदार चर्चा सुरू असून एसीबीच्या धडक कारवाईमुळे महसूल विभागातील अनेक अधिकाऱ्यांचे धाबे दणाणले आहेत.