मराठा आंदोलक मनोज जरांगे पाटील आणि सरकारमधील वाद हा दिवसेंदिवस वाढतच चालला आहे. गेल्या 14 दिवसांपासून जरांगे पाटील हे उपोषणाला बसले असून ते मुंबईला येण्यावर ठाम आहे. दरम्यान जरांगे पाटील यांनी भाष्य करत असताना उपमुख्यमंत्री एकनाथ शिंदे यांचा एकेरी उल्लेख केला होता. यावरूनच आता शिंदेसेना आक्रमक झाली आहे.

मनोज जरांगे पाटील यांनी उपमुख्यमंत्री एकनाथ शिंदे यांच्यावर एकेरी भाषेत टीका केल्यास ती सहन केली जाणार नाही, असा इशारा गृहराज्यमंत्री योगेश कदम यांनी दिला आहे. एकनाथ शिंदे यांचा एकेरी भाषेत उल्लेख केल्याने शिवसैनिकांसह राज्यातील सामान्य मराठा समाजही दुखावला असल्याचे कदम यांनी म्हटले.

योगेश कदम म्हणाले, मनोज जरांगे पाटील यांनी एकनाथ शिंदे यांच्यावर टीका करताना एकेरी भाषेचा वापर करू नये. तुम्ही ज्या भागातून येता, तिथे अशा पद्धतीची भाषा वापरली जात असेल. मात्र अशा भाषेमुळे अनेकांची मन दुखावली जात आहेत. त्यामुळे अशा प्रकारची भाषा वापरणे योग्य नाही. तसेच मराठा समाजासाठी देवेंद्र फडणीस आणि एकनाथ शिंदे यांनी जेवढे काम केले आहे, तेवढे काम कोणीही करू शकणार नाही, असा दावा त्यांनी केला.

योगेश कदम हे धाराशिव शहरातील के.टी. पाटील शाळेतील एका कार्यक्रमासाठी आले होते. यावेळी माध्यमांशी संवाद साधताना त्यांनी मनोज जरांगे पाटील यांच्या वक्तव्यावर प्रतिक्रिया दिली.