सचिन बनसोडे, साम टीव्ही

शिर्डी: पश्चिम बंगाल येथून कुटुंबीयांसोबत शिर्डीत दर्शनासाठी आलेल्या तरुणीचा साई संस्थानच्या भक्त निवासात विनयभंग झाल्याचा धक्कादायक प्रकार घडला आहे. तरुणीच्या फिर्यादीवरून कंत्राटी सफाई कर्मचारी आरोपी अमन पठाण याच्या विरोधात शिर्डी पोलिस ठाण्यात गुन्हा दाखल करण्यात आला आहे. घटनेनंतर फरार झालेल्या आरोपीला पोलिसांनी बेड्या ठोकल्या आहेत. दरम्यान साई संस्थानच्या भक्त निवासात कंत्राटी सफाई कर्मचारी असलेल्या आरोपी अमन पठाण याला निलंबित करण्यात आले आहे. हिंदुत्ववादी संघटनांनी घटनेचा निषेध केला असून, आरोपीवर कठोर कारवाईची करण्याची मागणी केली आहे..

नेमके प्रकरण काय?

पश्चिम बंगालमधील हावडा जिल्ह्यातील रहिवासी असलेले एक कुटुंब ४ जून रोजी शिर्डीत साई दर्शनासाठी आले होते. ते भक्तनिवासमध्ये मुक्कामी होते. ५ जून रोजी सायंकाळी ६ वाजेच्या सुमारास पीडितेचे आई-वडील आणि बहीण साईबाबांच्या दर्शनासाठी गेले होते, तर पीडिता रूममध्ये एकटीच होती. या दरम्यान, रूमची बेल वाजल्याने पीडितेने दरवाजा उघडला. समोर उभ्या असलेल्या अनोळखी इसमाने (आरोपी) मला तुझ्याशी बोलायचे आहे, मी रूममध्ये येऊ का? असे विचारले.

पीडितेने नकार दिला असता, त्याने तिला रूम नंबर २०४ जवळ येण्यास सांगितले. पीडिता तेथे गेली असता, आरोपीने तिचा हात धरून तिला रूममध्ये ओढले आणि तिच्याशी अश्लील वर्तन करत तिचा विनयभंग केला. तसेच माझा मोबाईल नंबर राहूदे, माझे नाव अमन पठाण आहे, असे सांगितले. पीडिता घाबरून जोरजोरातओरडू लागली आणि आपल्या रूममध्ये पळून आली.