पुण्यातील हगवणे हुंडाबळी प्रकरण ताजे असतानाच यवतमाळमधून एक संतापजनक घटना उघडकीस आली आहे. मारेगाव येथील एका २५ वर्षीय विवाहितेने पती आणि सासरच्या मंडळींविरोधात पोलिसात तक्रार दाखल केली असून, हुंड्यासाठी छळ, भोंदूबाबांकडून आघोरी उपचार, तसेच अमानुष वागणुकीचे गंभीर आरोप तिने केले आहेत. या प्रकरणी पोलिसांनी पतीसह सासरच्या तिघांविरोधात गुन्हा दाखल केला आहे.

पीडित महिलेचा विवाह २०२० साली गोंदिया जिल्ह्यातील व्यवसायिक आणि ठेकेदार अभिषेक घोषे याच्याशी झाला होता. विवाहानंतर काही महिन्यांतच सासरच्या लोकांनी तिला पैशासाठी त्रास देण्यास सुरुवात केली. आजारी असताना तिला डॉक्टरांकडे न नेत भोंदू बाबाकडे नेण्यात येत होते. घरात उपाशी ठेवून डांबून ठेवणे, असे अनेक प्रकार तिच्यावर लादण्यात आले, असा आरोप तिने केला आहे.

दरम्यान, पती अभिषेकने तिला गोंदिया येथील खासगी रुग्णालयात नेले असता डॉक्टरांनी तिला उपचारासाठी भरती करण्याचा सल्ला दिला. मात्र, पतीने पैसे नसल्याचे कारण देत जबाबदारी टाळली. रुग्णालयातच तिला चक्कर आल्याने तिला आयसीयूत दाखल करण्यात आले. दुसऱ्या दिवशी नातेवाईक पोहोचल्यावर उपचार सुरू झाले आणि त्यानंतर पीडिता आपल्या मालेगाव येथील माहेरी परतली.

महिलेची प्रकृती सुधारल्यानंतर पीडितेच्या वडिलांनी जावयाला संपर्क साधण्याचा प्रयत्न केला. मात्र त्याने प्रतिसाद देण्याऐवजी वकिलामार्फत नोटीस पाठवली. आई म्हणून मुलासोबत राहण्याच्या इच्छेने तिने यवतमाळ येथील महिला सहाय्य कक्षात अर्ज दिला. त्यानंतरही समेटाच्या उद्देशाने सप्टेंबर २०२३ मध्ये ती सासरी परत गेली, परंतु सासरच्यांनी घरात घेण्यास नकार दिला. उलट, "दहा लाख रुपये दिले तरच तिला नांदवू" अशी अट घातली.

यानंतर पीडितेने थेट पोलिसांत धाव घेतली. तिने दिलेल्या तक्रारीनुसार पती अभिषेक घोषे, सासरे वामन घोषे आणि सासू संगीता घोषे यांच्याविरोधात हुंडा प्रतिबंधक कायदा व भारतीय दंड संहिता (BNS) कलम ८५ व ३ अंतर्गत गुन्हा नोंदवण्यात आला आहे. पोलिसांकडून पुढील तपास सुरू आहे.