मनोज जयस्वाल 

वाशीम : मोटारसायकल चोरीच्या घटनांमध्ये झालेली वाढीबाबत अनेक तक्रारी पोलिसात दाखल होत्या. याचा पोलिसांकडून तपास सुरु असताना वाशीम आणि हिंगोली जिल्ह्यातून मोटर सायकल चोरणाऱ्या एका अट्टल चोरट्याला रिसोड पोलिसांनी अटक केले आहे. त्यांच्या कडून चोरी केलेल्या एकूण ९ मोटरसायकल जप्त करण्यात आल्या आहे. या प्रकरणी आणखी तपास सुरु आहे.

वाशीमच्या रिसोड पोलिसांनी केलेल्या कारवाईत सचिन उर्फ मिटठू मानकर असे या आरोपीला ताब्यात घेतले असून तो रामनगर रिसोड येथिल रहिवाशी आहे. गेल्या काही दिवसांपासून पोलीस स्टेशन रिसोड हद्दीतून मोटारसायकल चोरीच्या घटनेत वाढ झाली होती. त्यामुळे ठाणेदार चव्हाण यांनी दिलेल्या सूचनांचे पालन करून रिसोड डीबी पथक चोरी गेलेल्या मोटरसायकलचे शोध घेत होते. यासाठी सीसीटीव्हीची तपासणी देखील करण्यात आली. 

चोरीच्या ९ मोटारसायकली जप्त 

दरम्यान गुप्त बातमीदाराकडून मिळालेल्या माहितीवरून सचिन उर्फ मिटठू मानकर याला पोलिसांनी ताब्यात घेवून विचारपूस केली असता, त्याने हिंगोली आणि वाशीम जिल्ह्यातून मोटारसायकल चोरी केल्याची कबुली दिली. यानंतर चोरीच्या मोटारसायकल ठेवलेल्या ठिकाणी जात आरोपीकडून रिसोड आणि वाशीम शहर येथील एकूण ८ लाख २४ हजार रुपये किंमतीच्या ९ मोटरसायकल जप्त करण्यात आल्या आहे. 

पोलिसांकडून अधिकच तपास सुरु 

आणखी काही मोटरसायकलचे गुन्हे या आरोपीकडून उघड होतात का? याचा तपास रिसोड पोलीस करीत आहे. ही कारवाई रिसोड पोलीस स्टेशनचे पोलीस निरीक्षक रामेश्वर चव्हाण यांच्या मार्गदर्शनाखाली डी.बी. पथकाचे पोलीस उपनिरीक्षक सचिन गोखले आणि त्यांच्या पथकाने केली.