नाशिक जिल्ह्यातील कळवण तालुक्यातील मोहनदरी आदिवासी निवासी आश्रम शाळेतील एका विद्यार्थिनीच्या बाळंतपणाची घटना समोर आली आहे. यानंतर विद्यार्थिनींच्या सुरक्षिततेचा प्रश्न पुन्हा एकदा ऐरणीवर आला आहे. संबंधित विद्यार्थीनी अल्पवयीन असून ती आश्रम शाळेत शिक्षण घेत असताना ही घटना उघडकीस आली.

मिळालेल्या माहितीनुसार, संबंधित मुलगी उन्हाळी सुट्टीदरम्यान गावी गेली असताना तिच्यावर नात्यातील एका अल्पवयीन मुलाने लैंगिक अत्याचार केल्याचा आरोप आहे. त्यानंतर ती गर्भवती राहिली आणि अलीकडेच तिने बाळाला जन्म दिला. या प्रकरणाची माहिती समोर आल्यानंतर पोलिसांत गुन्हा दाखल करण्यात आलाय. आरोपी अल्पवयीन असल्याने त्याच्याविरुद्ध पॉक्सो (POCSO) कायद्यान्वये गुन्हा नोंदवून त्याला बालसुधारगृहात पाठवण्यात आले आहे.

या घटनेची माहिती मिळताच आदिवासी विकास विभागाने प्रकल्प कार्यालयामार्फत चौकशी सुरू केली आहे. आदिवासी विकास विभागाचे अप्पर आयुक्त दिनकर पावरा यांनी या घटनेची पुष्टी करताना सांगितलं की, "संबंधित मुलगी आश्रम शाळेत शिक्षण घेत होती. उन्हाळी सुट्टीत ती गावी गेली असताना ही घटना घडली. याप्रकरणी पोलीस ठाण्यात गुन्हा दाखल करण्यात आला असून आरोपीवर पॉक्सो कायद्यान्वये कारवाई करून त्याला बालसुधारगृहात पाठवण्यात आलंय. विभागीय स्तरावरही या प्रकरणाची चौकशी सुरू आहे."

दरम्यान, आश्रम शाळांमध्ये विद्यार्थ्यांची नियमित आरोग्य तपासणी केली जात असल्याचा दावा केला जातो. मात्र संबंधित विद्यार्थिनी गर्भवती असल्याची बाब वेळेत लक्षात का आली नाही, आरोग्य तपासणी आणि देखरेखीत कुठे त्रुटी राहिल्या का, याबाबत प्रश्न उपस्थित होतोय. तसंच या प्रकरणात संबंधित अधिकारी आणि कर्मचाऱ्यांची जबाबदारी निश्चित करण्याची मागणी होत आहे.

या घटनेनंतर पालक आणि सामाजिक संघटनांनी संताप व्यक्त केला असून आश्रम शाळांमधील विद्यार्थिनींच्या सुरक्षेसाठी अधिक प्रभावी उपाययोजना कराव्यात, संपूर्ण प्रकरणाची निष्पक्ष चौकशी करून दोषींवर कठोर कारवाई करावी आणि भविष्यात अशा घटना टाळण्यासाठी सक्षम यंत्रणा उभी करावी, अशी मागणी जोर धरू लागली आहे.