सातारा तालुक्यातील वेचले गावात विद्युत डीपीचा शॉक लागून 2 बैलांचा मृत्यू झाला तर बैलगाडीमधील तिघे जण जखमी झाले आहेत. या दुर्दैवी घटनेनंतर विद्युत विभागावर ग्रामस्थ संतप्त झाल्याचे पाहायला मिळाले.

वेचले गावात आज सकाळच्या सुमारास सोयाबीन पेरणीसाठी काही शेतकरी बैलगाडीतून निघाले हाेते. त्यावेळी अचानक बैलांना विद्युत झटका लागला आणि बैलं जागेवरच खाली पडली. या बैलगाडीमधील शेतकरी देखील जखमी झाले.

त्यानंतर घटनास्थळी जमाव जमला. काही ग्रामस्थांनी घटनेची माहिती पाेलिसांनी तसेच महावितरण कार्यालयास दिली. दरम्यान या घटनेचा जाब विचारात महावितरणच्या कारभारा विरोधात वेचले ग्रामस्थांनी अधिकाऱ्यांना घेराव घातला. महावितरणने शेतक-यांना नुकसान भरपाई द्यावी अन्यथा वेळ प्रसंगी महावितरण कार्यालय जाळून टाकू असा इशारा सामाजिक कार्यकर्ते रवींद्र कांबळे यांनी महावितरण कार्यालयाला दिला.

Edited By : Siddharth Latkar