पराग ढोबळे, साम प्रतिनिधी

नागपूरच्या जरीपटका परिसरातील एका शाळेत तिसरीत शिकणाऱ्या विद्यार्थ्याचा मृत्यू झाल्याची घटना घडलीय. ही घटना जरीपटका येथील राजकुमार केवलरामाणी हायस्कूलमध्ये घडली. मृत विद्यार्थ्याचे नाव खणीत कटरे आहे. शाळा प्रशासनाच्या हलगर्जीपणामुळे विद्यार्थ्याचा मृत्यू झाल्याचा गंभीर आरोप कुटुंबीयांनी केलाय. (Nagpur third standard student dies after collapsing in school)

हाती आलेल्या माहितीनुसार दुपारी शाळेची सुट्टी झाली होती त्यावेळी त्याला शाळेच्या मैदानात खणीत कटरे याला अचानक चक्कर आली, त्यानंतर तो खाली कोसळला. त्यानंतर त्याला तातडीने उपचारासाठी रुग्णालयात दाखल करण्यात आले. मात्र, उपचारादरम्यान त्याचा मृत्यू झाल्याची माहिती शालेय प्रशासनाने दिलीय.

परंतु मात्र शाळा प्रशासनाच्या हलगर्जीपणामुळे विद्यार्थ्याचा मृत्यू झाल्याचा गंभीर आरोप कुटुंबीयांनी केलाय. या दुर्घटनेनंतर शाळेच्या व्यवस्थापनावर प्रश्नचिन्ह उपस्थित होतोय. संबंधितांवर योग्य ती कारवाई करण्याची मागणी कुटुंबीयांसह नागरिकांकडून केली जात आहे.

आईचा शाळा प्रशासनावर गंभीर आरोप

खणीत कटरेंच्या मृत्यू प्रकरणी मृत मुलाच्या आईने थेट शाळा प्रशासनावर गंभीर आरोप केलेत. खणीत जेव्हा घरून शाळेत गेला होता, त्यावेळी तो खूप चांगला होता. त्याला जेवणाला सांगितलं होतं, त्याने जेवणं केलं. त्यानंतर बिस्कीट खाल्लं. त्यानंतर त्याला मी पैसे दिले. त्याने त्या पैशांचं बिस्कीट पुडाही घेतला.

पण जेव्हा तो शाळेच्या मैदानात पोहोचला. त्याला चक्कर कधी आली त्याला रुग्णालयात कधी दाखल केलं. हे माहिती नाहीये. आम्हाला दुपारच्यावेळी फोन आला. यात काहीतरी घोळ आहे. शाळेच्या मुख्याध्यापिका समोर येत नाहीयेत. त्यांनी विचारपूसही केली नाहीये.