नंदुरबारच्या अक्कलकुवा तालुक्यातील अमली बारी घाटात स्कूल बसचा भीषण अपघात घडला. विद्यार्थ्यांना घेऊन जाणारी बस थेट २०० फूट खोल दरीत कोसळली. या भीषण अपघातात एका विद्यार्थ्यांचा जागीच मृत्यू तर, अनेक विद्यार्थी गंभीररित्या जखमी झाले आहेत. त्यांना तातडीने रूग्णालयात उपचारासाठी पाठवण्यात आले. मृतांचा आकडा वाढण्याची शक्यता आहे.

मिळालेल्या माहितीनुसार, हे विद्यार्थी जळगाव जिल्ह्यातील अनुदानित आश्रम शाळेतील होते. शाळेची बस विद्यार्थ्यांना घेऊन जात असताना अपघात घडला. दिवाळीची सुट्टी संपल्यानंतर विद्यार्थ्यांना घेऊन जाण्यासाठी मेहुणबारे येथील शाळेची बस मोलगीहून अक्कलकुवाच्या दिशेने जात असतानाच अपघात घडला.

स्कूलबस मध्ये अंदाजे 40 ते 45 विद्यार्थी असल्याची माहिती आहे. अमली बारी घाटातील तीव्र वळणावर वाहनावरील ताबा सुटल्याने बस थेट 200 फूट खोलदरीत कोसळली. या भीषण अपघातात बसचा चक्काचूर झाला. घटनेची माहिती मिळताच बचाव पथकाने घटनास्थळी धाव घेतली. तसेच विद्यार्थ्यांना बसमधून बाहेर काढून रूग्णालयात नेलं.

या घटनेनंतर पोलिसांनी घटनास्थळी धाव घेत तपासाला सुरूवात केली आहे. हा भीषण अपघात नेमका घडला कसा? बस २०० फूट दरीत कोसळली कशी? याचा तपास सुरू आहे. हा अपघात नेमकं कोणत्या चुकीमुळे झाली? याचाही तपास पोलिसांकडून सुरू आहे. सध्या बसमध्ये अडकलेल्या विद्यार्थ्यांना वाचवण्यासाठी शर्तीचे प्रयत्न सुरू आहेत.