शिंदे सेनेकडून ठाकरे गट अन् राष्ट्रवादी काँग्रेसला धक्का, बड्या नेत्यांनी हाती धरलं धनुष्यबाण

आगामी स्थानिक स्वराज्य संस्थांच्या निवडणुकीच्या पार्श्वभूमीवर राजकीय घडामोडींना वेग आला आहे. अशातच कल्याणनंतर नाशिकमधून मोठी बातमी समोर येत आहे. नाशिकमध्ये शिवसेना ठाकरे गट आणि राष्ट्रवादी काँग्रेस शरद पवार गटाला धक्का बसला आहे. अनेक युवा पदाधिकाऱ्यांनी हाती धनुष्यबाण घेतलं आहे. शिवसेना शिंदे गटात पक्षप्रवेश झाल्यामुळे नाशिकमध्ये शिंदेसेनेची ताकद वाढली आहे.

नाशिक ग्रामीण, सिन्नर तालुक्यातील शिवसेना ठाकरे गट आणि राष्ट्रवादी काँग्रेस शरद पवार गटाला गळती लागली आहे. अनेक युवा पदाधिकाऱ्यांनी शिवसेना शिंदे गटात पक्षप्रवेश केला आहे. उपमुख्यमंत्री एकनाथ शिंदे यांच्या उपस्थितीत हा पक्षप्रवेश सोहळा पार पडला. ठाण्यातील शुभ - दिप निवासस्थानी पदाधिकाऱ्यांनी धनुष्यबाण हाती घेतलं आहे.

या पक्षप्रवेशाबाबत माजी खासदार हेमंत गोडसे म्हणाले, 'स्थानिक स्वराज्य संस्थेच्या निवडणुका आता जाहीर झालेले आहेत. ठाकरे गट आणि राष्ट्रवादी (श.प) गटातून अनेक सिन्नर तालुका आणि नाशिक ग्रामीण पट्ट्यातून अनेक तरुणांनी शिवसेनेमध्ये आज प्रवेश केला आहे'; अशी माहिती गोडसे यांनी दिली.

'जेव्हा निवडणूक जाहीर होतात, तेव्हा ज्या पक्षावर अधिक विश्वास असतो. त्याकडे तिथे येणाऱ्यांची ओढ असते. नाशिक ग्रामीण आणि सिन्नर तालुकासह अनेक ठिकाणी आम्हाला यश मिळेल', असा विश्वासही यावेळी त्यांनी व्यक्त केला.

'लोकांना विकास कामे आणि काम करणारं नेतृत्व हवं असतं. मुख्यमंत्री फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार हे लोकांसाठी अहोरात्र काम करतात. ते २४ तास पैकी १८ तास काम करतात. काम करणारं नेतृत्व हे राज्याला लाभलं आहे. त्यामुळे महायुतीमध्ये काम करण्याची ओढ या ठिकाणी आहे', असं गोडसे म्हणाले.