- भारत नागणे / सचिन जाधव

Ashadhi Ekadashi : आषाढी वारीसाठी (Ashadhi Wari 2023) सर्वच प्रमुख व मानाच्या पालख्यांनी पंढरपूरकडे प्रस्थान ठेवले आहे. पंढरपूरात भाविकांची गर्दी वाढू लागली आहे. यंदा मंदिर समितीने दर्शन रांगेसाठी गोपाळपूर रोडवरील मैदानावर दहा पत्र शेडची उभारणी केली आहे. (Maharashtra News)

संत श्री ज्ञानेश्वर महाराज आणि संत श्री तुकाराम महाराज यांच्या पालख्यांचे आज (साेमवार) पुण्यात आगमन होणार आहे. संत ज्ञानेश्वर महाराज यांच्या पालखीचा मुक्काम श्री पालखी विठ्ठल मंदिर (भवानी पेठ) तर संत तुकाराम महाराज यांच्या पालखीचा मुक्काम श्री निवडुंगा विठोबा मंदिरात (नाना पेठ) येथे असेल.

दोन्ही मंदिरांमध्ये यासाठी जय्यत तयारी करण्यात आली आहे. सायंकाळी मंदिरांमध्ये पालखीचे आगमन झाल्यावर अभिषेक, पादुका पूजन आणि आरतीने पालख्यांचे स्वागत होणार आहे.

त्यानंतर रात्रभर भाविकांना पादुकांचे दर्शन घेता येणार आहे. दोन्ही मंदिरांमध्ये उत्सव मंडपाच्या उभारणीसह विद्युत रोषणाई आणि फुलांची सजावट करण्यात आली आहे.

आज (साेमवार) सायंकाळी 7 ते 8.30 च्या सुमारास संत ज्ञानेश्वर महाराज यांची पालखी (Sant Dnyaneshwar Maharaj Palkhi Sohala) मुक्कामासाठी श्री पालखी विठ्ठल मंदिर (भवानी पेठ) तसेच संत तुकाराम महाराज (Sant Tukaram Maharaj Palkhi Sohala) यांची पालखी मुक्कामासाठी श्री निवडुंगा विठोबा मंदिरात (नाना पेठ) येणार आहे.

दाेन दिवसांपुर्वी पालकमंत्री राधाकृष्ण विखे पाटील यांनी पंढरपूरातील विठ्ठल रखुमाई मंदिरास भेट दिली. त्यावेळी भाविकांना उन्हाचा त्रास होऊ नये यासाठी मंदिर परिसरातील रस्त्यांवर पत्रा शेड उभारली जातील तसेच दर्शन रांगेतील भाविकांना पाणी आणि नाष्टा देण्याची व्यवस्था केली जाईल असे म्हटलं हाेते.

दरम्यान मंदिर समितीने दर्शन रांगेसाठी गोपाळपूर रोडवरील मैदानावर दहा पत्र शेडची उभारणी केली आहे. येथील एका पत्राशेड मध्ये किमान एक हजार ते बाराशे भाविक उभे राहतील अशी व्यवस्था केली आहे. दर्शन रांगेतील भाविकांच्या पायांना खडे टोचू नयेत म्हणून मॅटची व्यवस्था केली आहे. दर्शन रांगेतील भाविकांना विठुरायाचे चोवीतास लाईव्ह दर्शनाचीही व्यवस्था करण्यात आली आहे.

याबराेबरच दर्शन रांगेतील भाविकांना पाणी, चहा, नाष्टा याबरोबरच आरोग्याच्या सोयी सुविधा उपलब्ध करून दिल्या आहेत.

Edited by : Siddharth Latkar