>> संजय डाफ

नागपूर : राज्यातील मोठे प्रकल्प बाहेर गेल्याने सत्ताधारी आणि विरोधक आमनेसामने आले आहेत. टाटा एअरबस प्रकल्प यापैकीच एक होता. टाटा एअरबस प्रकल्प नागपूरमध्ये व्हावा यासाठी केंद्रीय मंत्री नितीन गडकरी (Nitin Gadkari) आग्रही होते. त्यासाठी टाटा समूहाचे अध्यक्ष एन चंद्रशेखरन यांच्याशी पत्रव्यवहारही केला होता. मात्र तरीही प्रकल्प राज्याबाहेर गेला आहे.

टाटाचा मोठा प्रोजेक्ट बाहेर गेल्याने रोजगाराला मोठा फटका बसला आहे. मात्र टाटाचा प्रोजेक्ट नागपूरच्या मिहानमध्ये आणणार असं नितीन गडकरी यांनी म्हटलं आहे. गडकरी यांनी ऑफ द रेकॉर्ड ही माहिती दिली आहे. नागपूर विमानतळावर आल्यावर बाईट देण्यास त्यांनी नकार दिला, मात्र अनौपचारीक बोलताना त्यांही ही माहिती दिली. (Latest Marathi News)

गडकरी यांनी टाटा सन्सच्या अध्यक्षांना टाटाचा प्रकल्प मिहानमध्ये आणावा यासाठी पत्र लिहलं होतं. त्यानंतर टाटाचे अध्यक्ष एन. चंद्रशेखरन यांनी गडकरी यांना पत्र लिहून सकारात्मक प्रतिसाद दिला होता. त्यामुळे एकीकडे मोठे प्रकल्प राज्याबाहेर जात असताना रोजगाराच्या शोधात असलेल्या तरुणांसाठी ही नक्कीच दिलासादायक माहिती आहे.

महाराष्ट्रासाठी दोन लाख कोटींचे 225 प्रकल्प मंजूर

महाराष्ट्रात केंद्र सरकारने सुमारे दोन लाख कोटींहून अधिक किमतीचे प्रकल्प मंजूर केले आहेत. या प्रकल्पांचे काम एकतर सुरू आहे किंवा लवकरच सुरू होणार आहे. महाराष्ट्रात रेल्वेसाठी 75 हजार कोटी रुपये आणि आधुनिक रस्त्यांसाठी 50 हजार कोटी रुपयांचे प्रकल्प मंजूर झाले आहेत. जेव्हा सरकार पायाभूत सुविधांवर एवढी मोठी रक्कम खर्च करते, तेव्हा त्यातून लाखो नवीन रोजगाराच्या संधी निर्माण होतात, असं नरेंद्र मोदी यांनी म्हटलं आहे.