बदलापूर शहरात गेल्या काही दिवसांपासून चेन स्नॅचिंगच्या घटनांमध्ये वाढ झाली होती. या घटनांमुळे नागरिकांमध्ये भीतीचे वातावरण निर्माण झाले होते. बदलापूर पूर्व पोलिसांनी एका अट्टल चेन स्नॅचरला अटक केली असून त्याच्याकडून बदलापूरमधील चेन स्नॅचिंगच्या 5 गुन्ह्यांची उकल झाली आहे. हा चोरटा युट्युबवर चेन स्नॅचिंग कशी करावी? याचे व्हिडीओ बघून चेन स्नॅचिंग शिकल्याची माहिती पोलिसांनी दिली आहे.

बदलापूर पूर्व आणि पश्चिम पोलीस ठाण्याच्या हद्दीत मागील काही दिवसात चेन स्नॅचिंगचे सलग 5 गुन्हे घडले होते. त्यामुळे पोलिसांकडून आरोपीचा माग काढण्याचे प्रयत्न सुरू होते. अशातच बदलापूर शहरात संशयास्पदरित्या फिरणाऱ्या एका इसमाला पोलिसांनी पाठलाग करून ताब्यात घेतलं. त्याची चौकशी केली असता त्याने आपणच चेन स्नॅचिंगचे 5 गुन्हे केल्याची कबुली पोलिसांना दिली.

या चोरट्याचं नाव प्रवीण प्रभाकर पाटील असं असून तो कर्जत जवळच्या शेलू इथं राहणारा आहे. प्रवीण याच्यावर आधी कर्जत तालुक्यात हत्येच्या प्रयत्नाचा एक गुन्हा दाखल आहे. त्यानंतर झटपट पैसे कमावण्याच्या उद्देशाने युट्युबवर चेन स्नॅचिंग कशी करावी? याचा व्हिडिओ त्याने पाहिला आणि त्यानंतर बदलापूर शहरात एकटाच येऊन तो चेन स्नॅचिंग करू लागला. मात्र अखेर बदलापूर पूर्व पोलीस स्टेशनचे वरिष्ठ पोलीस निरीक्षक किरण बालवडकर आणि गुन्हे पोलीस निरीक्षक राजेश गजल यांच्या मार्गदर्शनाखालील टीमने प्रवीण पाटील याला बेड्या ठोकत त्याच्याकडून पाच गुन्ह्यांची उकल केली.

बदलापूर पूर्व पोलीस ठाण्याचे वरिष्ठ निरीक्षक यांनी नागरिकांना आश्वासन दिले आहे की, पोलिसांची गस्त वाढवण्यात येणार आहे, तसेच अशा गुन्हेगारांवर कठोर कारवाई केली जाईल. नागरिकांनी कोणतीही संशयास्पद व्यक्ती दिसल्यास तातडीने पोलिसांना कळवावे, असेही आवाहन करण्यात आले आहे.