Buldhana News: बुलडाण्यात (Buldhana) एसटी बस (ST Bus) आणि लक्झरी बसला (luxury bus) भीषण अपघात झाल्याची घटना समोर आली आहे. बुलडाण्याच्या राजुर घाटात हा अपघात झाला आहे. या अपघातामध्ये एसटी बसमधील 6 प्रवासी जखमी झाले आहेत. या अपघाताचा तपास बुलडाणा शहर पोलिसांकडून (Buldhana City Police) सुरु आहे.

मिळालेल्या माहितीनुसार, बुलडाण्याजवळच्या राजुर घाटामध्ये एका लक्झरी बसने एसटीला पाठीमागून जोरदार धडक दिली. पुण्यावरुन मलकापूरला ही एसटी बस जात होती. या एसटी बसला राजूर घाटातील हनुमान मंदिराजवळील वळणावर लक्झरी बसने जोरदार धडक दिली. घाटातील वळणावर एसटी बसने वेग कमी केला. त्याचवेळी पाठीमागून भरधाव येणाऱ्या लक्झरी बसने एसटीला धडक दिली. या अपघातामध्ये एसटीमधील सहा प्रवासी जखमी झाले.

एसटी चालकाने तात्काळ प्रसंगावधान दाखवत बसमधील जखमी प्रवाशांना इतर वाहनातून बुलडाण्याच्या जिल्हा सामान्य रुग्णालयात उपचारासाठी पाठवले. या सर्व जखमी प्रवाशांवर उपचार सुरु आहेत. या अपघातानंतर लक्झरी चालकाने घटनास्थळावरुन पळ काढला. या घटनेची माहिती मिळताच बुलडाणा शहर पोलिसांनी घटनास्थळी धाव घेत तपास सुरु केला. या अपघातामध्ये एसटी बसच्या मागील बाजूचे तर लक्झरी बसच्या पुढील भागाचे मोठे नुकसान झाले आहे. या अपघातामुळे राजुर घाटातील वाहतूक काही काळ विस्कळीत झाली होती.