माधव सावरगावे, साम टीव्ही

छत्रपती संभाजीनगर मधील रस्त्यावर भरधाव वेगाने अन् धोकादायकरित्या स्कुटी चालवून स्वतःसह इतरांच्या जिवाला धोका निर्माण करणाऱ्या एका बेपरवा चालकाविरोधात छावणी पोलीस ठाण्यात गुन्हा दाखल करण्यात आला आहे. १ सप्टेंबर रोजी दुपारी घडलेल्या या प्रकाराप्रकरणी पोलिसांच्या तक्रारीवरून शुक्रवारी (दि. ४ सप्टेंबर) रात्री उशिरा ही कारवाई करण्यात आली.

अदनान पठाण (रा. पाणचक्की, छत्रपती संभाजीनगर) असे गुन्हा दाखल करण्यात आलेल्या आरोपीचे नाव आहे. पोलीस सूत्रांनी दिलेल्या माहितीनुसार, १ सप्टेंबर रोजी दुपारी चार वाजेच्या सुमारास आरोपी अदनान याने त्याच्या ताब्यातील स्कुटी सार्वजनिक रस्त्यावर अत्यंत वेगाने आणि बेदरकारपणे पळवली. पाणचक्की ते औरंगपुरा या गजबजलेल्या मार्गावर वाहतुकीच्या नियमांचे उघडपणे उल्लंघन करत त्याने धोकादायकरित्या वाहन चालवले. वाहतूक नियमांची पायमल्ली करणाऱ्या या बेजबाबदार चालकाविरोधात छावणी पोलीस ठाण्याचे अंमलदार महाशंख नामदेवराव दांडगे यांनी फिर्याद दिली.

त्यांच्या तक्रारीवरून आरोपी अदनान पठाणविरुद्ध भारतीय न्याय संहितेतील कलम २८१, १२५ तसेच मोटार वाहन कायद्यातील कलम १९४, १२८, १८४ आणि १७७ अंतर्गत गुन्हा नोंदवण्यात आला आहे. या प्रकरणाचा पुढील तपास श्रेणी पोलीस उपनिरीक्षक हिवाळे यांच्या मार्गदर्शनाखाली पोलीस अंमलदार शेख करत आहेत. सार्वजनिक रस्त्यांवर नियमांचे उल्लंघन करून हुल्लडबाजी करणाऱ्या वाहनचालकांवर यापुढेही कडक कारवाई केली जाईल, असा इशारा पोलिसांनी दिला आहे.