विश्वभूषण लिमये, सोलापूर

सोलापूरमध्ये विद्यार्थिनीने आत्महत्या केल्याची घटना समोर आली आहे. दक्षिण सोलापूर तालुक्यातील विंचूरमध्ये ही घटना घडली. १८ वर्षीय महाविद्यालयीन विद्यार्थिनीने गळफास घेत आयुष्य संपवलं. राहत्या घरातच तिने ओढणीने गळफास घेत आत्महत्या केली. या विद्यार्थिनीने आत्महत्या का केली यामागचे कारण अद्याप समोर आले नाही. पण या घटनेमुळे सोलापूरमध्ये खळबळ उडाली.

श्रेया पुंडलिक गायकवाड (वय १८ वर्षे) असं आत्महत्या केलेल्या तरुणीचे नाव आहे. लहान असतानाच श्रेयाच्या डोक्यावरील आई-वडिलांचे छत्र हरपले. मात्र ती आणि तिची बहीण आई-वडिलांचे स्वप्न पूर्ण करण्यासाठी जिद्दीने शिक्षण घेत होत्या. सकाळी कॉलेजला जाण्यासाठी नेहमीप्रमाणे दोघी निघाल्या होत्या. मात्र डबा विसरल्याने त्या घरी परत आल्या. मात्र डबा न घेता श्रेयाने घराचा दरवाजा बंद करून ओढणीने गळफास घेतला. एकमेकीला कधीच सोडून न राहणाऱ्या या सख्ख्या बहिणीतील बीएससीचे शिक्षण घेणारी श्रेया ही आपल्या लाडक्या स्नेहल या बहिणीला एकटी सोडून गेली. दक्षिण सोलापूर तालुक्यातील विंचूर या गावी ही हृदय पिळवटून टाकणारी घटना घडली. श्रेया कायमची सोडून गेल्यामुळे तिच्या बहिणीला मोठा धक्का बसला.

या घटनेची माहीती मिळताच मंद्रूप पोलिसांनी घटनास्थळी धाव घेतली. या प्रकरणी पोलिसांनी अकस्मात मृत्यूची नोंद केली. पोलिसांनी सांगितले की, आत्महत्या केलेली श्रेया आणि तिची मोठी बहीण स्नेहल या दोघी सकाळी कॉलेजसाठी सोलापूरला जाण्यासाठी घरातून निघाल्या. मात्र जेवणाचा डबा विसरल्याने त्या दोघी पुन्हा घरी परत आल्या. मोठी बहीण स्नेहल ही बाहेर बाथरूमला गेली. तेव्हा श्रेयाने घरामध्ये जाऊन दरवाजा बंद करून घेतला.

राहत्या घरातील पंख्याला ओढणीने गळफास घेत तिने आत्महत्या केली. मोठी बहीण स्नेहल ही थोड्या वेळात घरी आली तर दरवाजा आतून बंद होता. आवाज दिला तर श्रेयाने प्रतिसाद दिला नाही. त्यामुळे तिने खिडकीतून डोकावून पाहिले तर श्रेया पंख्याला लटकत असल्याचे तिला दिसले. घराशेजारील चुलत भावांना तिने ओरडून माहिती दिली. त्यानंतर सर्वांनी मिळून दरवाजा तोडला. लगेच श्रेयाला एका खासगी वाहनातून बेशुद्धावस्थेत मंद्रुपच्या ग्रामीण रुग्णालयात नेण्यात आले पण डॉक्टरांनी उपचारापूर्वी तिला मृत घोषीत केले.