Solapur APMC Market News:

कांद्याला योग्य भाव देणारी मोठी बाजारपेठ अशी सोलापूर कृषी उत्पन्न बाजार समितीची ओळख आहे. त्यामुळेच महाराष्ट्रासह कर्नाटक, तेलंगणा, आंध्रप्रदेशातूनही शेतकरी आपला माल घेऊन सोलापूरमध्ये येत असतात. मात्र सलग सुट्ट्यांमुळे बाजारपेठेत कांद्याची मोठी आवक झाल्यामुळे दरात घसरण झाली आहे, ज्याचा थेट फटक बळीराजाला बसताना दिसत आहे.

सोलापूर (Solapur) कृषी उत्पन्न बाजार समितीत आज पुन्हा एकदा कांद्याची विक्रमी आवक झाली आहे. बुधवारी (२४, जानेवारी) बाजार समिती बंद राहिल्याने तसेच उद्या प्रजासत्ताक दिनानिमित्त बाजाराला सुट्टी असल्याने आवक वाढली असून तब्बल 1500 गाडी कांदा मार्केटमध्ये आला आहे. आवक वाढल्याने कांद्याचे दर 200 रुपये प्रती क्विंटलने घसरलेत.

मंगळवारी कांद्याला 1200 ते 1400 रुपये प्रती किलो इतका भाव होता. आज मात्र कांद्याला 800 ते 1200 रुपये इतका भाव मिळत आहे. निर्यातबंदीमुळे शेतकऱ्यांना मोठा फटका बसत असल्याचे शेतकऱ्यांचं म्हणणं आहे तर बदलत्या वातावरणमुळे आवक वाढत असल्याची प्रतिक्रिया व्यापाऱ्यांनी दिली आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

दरम्यान, कांद्याचे दर उतरल्याने वाहतुकीचा खर्चही निघत नसल्याची भावना शेतकऱ्यांनी व्यक्त केली आहे. तसेच कांद्याची निर्यातबंदी उठवून हमीभाव द्या अन्यथा आत्महत्या करण्याची परवानगी द्या अशी संतप्त मागणीही शेतकऱ्यांनी दिली आहे. त्याचबरोबर येत्या निवडणुकीत 'नोटा'ला मतदान करण्याचा इशाराही शेतकऱ्यांनी दिला आहे. (Latest Marathi News)