विनायक वंजारे, कुडाळ

कोकणातील चिपळूण तालुक्यात ७ १२ साठी महसूल मंडळ अधिकाऱ्याने लाच घेतल्याची घटना ताजी असतानाच आता सिंधुदुर्गातील कुडाळमधून मोठी बातमी समोर आली आहे. कुडाळ नगरपंचायतीचा स्वच्छता निरीक्षक पांडुरंग वासुदेव नाटेकर हा ACB च्या जाळ्यात अडकला. व्यवसायासाठी NOC मिळवून देण्यासाठी तक्रारदाराकडे १२०० रुपये किमतीची खड्यासह चांदीची अंगठी लाच म्हणून मागितल्याचा आरोप त्याच्यावर करण्यात आला आहे. या घटनेनंतर नगरपंचायत प्रशासनात एकच खळबळ उडाली आहे.

मिळालेल्या माहितीनुसार, तक्रारदाराला कुडाळ नगरपंचायतीकडून व्यवसायासाठी ना हरकत दाखला मिळवायचा होता. हा दाखला मिळवून देण्यासाठी स्वच्छता निरीक्षक नाटेकर याने तक्रारदाराकडे चांदीची अंगठी देण्याची मागणी केल्याचे समोर आले. याबाबत तक्रारदाराने लाचलुचपत प्रतिबंधक विभागाकडे तक्रार केली.

तक्रारीची पडताळणी केल्यानंतर संबंधित विभागाने कारवाईची तयारी केली. त्यानुसार तक्रारदाराकडून अंगठी स्वीकारताना नाटेकर याच्यावर कारवाई करण्यात आली. या कारवाईदरम्यान त्याने तक्रारदाराकडून अंगठी स्वीकारल्याचे निष्पन्न झाल्याचे लाचलुचपत विभागाकडून सांगण्यात आले.

दरम्यान, कारवाईपूर्वी नाटेकर याला संशय आल्याचेही तपासात समोर आले आहे. संशय आल्यानंतर त्याने घेतलेली चांदीची अंगठी लपवून ठेवण्याचा प्रयत्न केला. तसेच या माध्यमातून लाचेचा पुरावा नष्ट करण्याचा प्रयत्न केल्याचे विभागाने स्पष्ट केले आहे. या प्रकरणामुळे कुडाळ नगरपंचायतीच्या कारभारावर प्रश्नचिन्ह निर्माण झाले असून, प्रशासनात मोठी खळबळ उडाली आहे. या प्रकरणाचा पुढील तपास लाचलुचपत प्रतिबंधक विभागाकडून सुरू असून, कारवाईनंतर नगरपंचायत प्रशासनाकडून याबाबत कोणती भूमिका घेतली जाते, याकडे सर्वांचे लक्ष लागले आहे.