MLC Election: मोठी राजकीय घडामोड! निवडणुकीआधी NDA ला मिळाली खूशखबर; ऐनवेळी बंडखोर उमेदवाराची माघार

महाराष्ट्रात आणि बिहारमध्ये विधान परिषद निवडणुकीच्या पार्श्वभूमीवर मोठ्या घडामोडी घडत आहेत. महाराष्ट्रात बंडखोर उमेदवारांनी भाजपसह महायुतीचं टेन्शन वाढवलं. दुसरीकडे बिहार विधानपरिषदेच्या निवडणुकीआधी एनडीएला खूशखबर मिळालीय. विधानपरिषदेच्या रिंगणात अपक्ष उमेदवार म्हणून उतरलेले रामपुकार सिन्हा यांनी निवडणुकीतून माघार घेतलीय. त्यांनी विधानपरिषद निवडणुकीत एनडीए उमेदवाराला पाठिंबा देण्याचा आणि सत्ताधारी आघाडीसाठी प्रचार करण्याचा निर्णय घेतलाय.

रामपुकार सिन्हा यांनी शुक्रवारी उमेदवारी मागे घेण्याची घोषणा केली आहे. सारण शिक्षक मतदारसंघासाठी अपक्ष उमेदवार म्हणून आपला उमेदवारी अर्ज दाखल केला होता. उपेंद्र कुशवाहा यांच्या 'राष्ट्रीय लोक मोर्चा' (RLM) पक्षातील चारपैकी तीन आमदारांनी माधव आनंद, आलोक सिंग आणि रामेश्वर महतो यांनी रामपुकार यांना पाठिंबा दिलाय.

राष्ट्रीय लोक मोर्चाचे प्रदेशाध्यक्ष आलोक सिंग म्हणाले की, आता रामपुकार आणि हे तिन्ही आमदार एनडीएच्या उमेदवारासाठी प्रचार करतील. याआधी बंडखोर भूमिकेमुळे कुशवाहा यांनी रामपुकार यांना RLM मधून सहा वर्षांसाठी निलंबित केलं होतं.

राष्ट्रीय लोक मोर्चा पक्षाचे राज्य सरचिटणीस राहिलेले रामपुकार सिन्हा यांनी शुक्रवारी पाटणा येथे माघारी घेण्याची घोषणा केलीय. विधान परिषदेच्या निवडणुकीतून ते माघार घेत असून एनडीए उमेदवारसाठी प्रचार करतील. या घोषनेनंतर पक्षाचे प्रदेशाध्यक्ष अलोक सिंह म्हणाले, एनडीए हा एक परिवार आहे. एनडीए युतीमध्ये जे निर्णय घेण्यात आलेत, जो निर्णय घेण्यात आलाय, तो सर्वांना मान्य आहे.

रामपुकार सिन्हा यांनी निवडणुकीची तयारी करण्यासाठी आपली शिक्षकपदाची नोकरी सोडली होती; म्हणूनच, आरएलएमओ (RLMO) चे प्रदेशाध्यक्ष या नात्याने आम्ही त्यांना पाठिंबा दिला. मात्र, आम्ही एनडीए (NDA) चे सैनिक आहोत आणि अशा स्थितीत एनडीए नेतृत्वाचा निर्णय सर्वोपरी आहे.

रामपुकार आरएलएमओमध्ये परतणार का?

आलोक यांनी सांगितले की, विधान परिषदेच्या निवडणुकीसाठी पक्षाचे तिन्ही आमदार सारण शिक्षक मतदारसंघातील जेडीयू उमेदवार आनंद पुष्कर यांच्यासाठी एकत्रितपणे प्रचार करणार आहेत. रामपुकार सिन्हा देखील या मोहिमेचा भाग असतील. त्यांनी या निवडणुकीत एनडीएच्या विजयाबद्दल विश्वास व्यक्त केलाय. तसेच आलोक सिंग यांनी रामपुकार सिन्हा यांच्या आरएलएमओ (RLMO) मध्ये परतण्याच्या शक्यतेकडेही संकेत दिलेत.