पहलगाम येथे झालेल्या दहशतवादी हल्ल्यानंतर संपूर्ण भारतात खळबळ उडाली. नंतर भारताने ऑपरेशन सिंदूर राबवलं. अजूनही पहलगाम हल्ल्याच्या निषेधार्थ भारतीयांच्या मनात आग धगधगत आहे. आज दुबईत भारत पाकिस्तानची मॅच रंगणार आहे. याच पार्श्वभूमीवर या सामन्याचा निषेध करण्यासाठी शिवसेना ठाकरे गट मैदानात उतरणार आहे. आज पत्रकार परिषदेत ठाकरे गटाचे खासदार संजय राऊतांनी भारत- पाकिस्तान सामन्याला पाठिंबा देणाऱ्या नेत्यांवर जहरी टीका केली. तसेच उपमुख्यमंत्री अजित पवारांच्या विधानाचाही समाचार घेतला.

अजित पवार नेमकं काय म्हणाले?

भारत पाकिस्तान सामन्याबद्दल उपमुख्यमंत्री अजित पवार म्हणाले, 'खेळाकडे खेळाच्या नजरेनं बघावे की नाही, हा प्रत्येकाचा अधिकार आहे. हा अधिकार संविधानाने आणि बाबासाहेब आंबेडकरांच्या घटनेनं दिला आहे. सत्ताधारींच्या विरोधात भूमिका घेण्यासाठी विरोधक निमित्त पाहत असतात. या गोष्टीला भावनिक मुद्दा करू नये. असे माझे आवाहन आहे', असं अजित पवार म्हणाले.

अजित पवारांच्या विधानाचा संजय राऊतांनी समाचार घेतला. 'अजित पवारांच्या अंगात पाकड्यांचे रक्त वाहतंय. ते अर्धे पाकिस्तानी आहेत. राज्याचा मंत्री जर भारत -पाक सामना पाहण्याची भाषा वापरत असेल तर, ती राष्ट्रभक्त नागरिकाची भाषा नाही', असं संजय राऊत म्हणाले.

'पहलगाम हल्ल्यातील मृत्यूमुखी पडलेल्या २६ लोकांमध्ये तुमच्या घरातील कुणी असते तर, तुम्ही असं बोलले नसता', असंही संजय राऊत म्हणाले. अजित पवारांसह त्यांनी उपमुख्यमंत्री एकनाथ शिंदेंवरही टीकेची तोफ डागली. 'शिंदेंचा पक्ष हा पक्ष नसून, अमित शहांची छोटी कंपनी आहे. तात्पुरत्या स्वरूपात शेअर बाजारात टाकलेला हा माल आहे. देशाच्या भावना काय आहे, ही लोक बोलत काय आहेत', असं राऊत म्हणाले.