Shivsena Morcha : महापालिकेच्या ढिसाळ कारभारा विरोधात आज (शुक्रवार) शिवसेनेने जिल्हाधिकारी कार्यालयावर जन आक्रोश मोर्चा काढला. या माेर्चात सेनेच्या कार्यकर्त्यांसह हजारो परभणीकर सहभागी झाले हाेते. (Maharashtra News)

परभणी शहर महानगरपालिकेमध्ये मागील दोन वर्षापासून प्रशासक आहे. मागील दोन वर्षाच्या काळात परभणी शहरातील नागरिकांना नागरी सुविधा तर मिळाल्याच नाहीत पण मनपा आयुक्त तृप्ती सांडभोर (trupti sandbhor) यांनी करवाढ मात्र मोठ्या प्रमाणात केली आहे.

नळपट्टी असो की घरपट्टी यामध्ये प्रचंड वाढ करण्यात आली आहे. दुसरीकडे शहरांमध्ये रस्त्यांची दयनीय अवस्था आहे. रस्ते आहेत की खड्डे आहेत हेच कळायला मार्ग नाही. त्याचबरोबर संपूर्ण शहरात धुळीचे साम्राज्य झाले आहे. धुळीमुळे परभणीकरांना डोळ्यांच्या आजारांना सामोरे जावे लागत आहे.

त्यामुळे परभणीकरांचा जन आक्रोश मोर्चाच्या रूपाने शिवसेनेचे खासदार संजय जाधव (mp sanjay jadhav) आणि आमदार डॉक्टर राहुल पाटील (mla dr. rahul patil) यांनी जिल्हाधिकारी यांच्या समाेर जनतेचे प्रश्न मांडले. हजारो नागरिक या मोर्चात सहभागी झाले हाेते. यावेळी आंदाेलकांनी महानगरपालिकेची प्रतिकात्मक प्रेतयात्रा देखील काढली.

Edited By : Siddharth Latkar