सचिन कदम, रायगड

रायगडमधून एक मोठी बातमी समोर आली आहे. शिवसेना ठाकरे गटाचे रायगड लोकसभा मतदारसंघ समन्वयक संजय कदम यांच्या कारला भीषण अपघात झालाय. सुदैवाने या घटनेत कोणतीही जीवितहानी झालेली नाही.

मिळालेल्या अधिक माहितीनुसार, मुंबई कुर्ला मार्गावर प्रवास करताना संजय कदम यांच्या कारला आयशर ट्रकने मागून जोरदार धडक दिली. या धडकेत कारच्या मागच्या बाजूचा चुराडा झाला. घटनेची माहिती मिळताच पोलिसांनी घटनास्थळी धाव घेतली. पोलिसांनी आयशर ट्रक ताब्यात घेतला आहे.

पोलिसांनी दिलेल्या माहितीनुसार, रायगड जिल्हयातील रोहा येथून शिवसेना ठाकरे गटाचे रायगड लोकसभा मतदारसंघ समन्वयक संजय कदम प्रचार सभा आटोपून मुंबईला परत जात होते. त्यावेळी वाटेतच त्यांच्या कारचा अपघात झाला. यात गाडीच मोठ्या प्रमाणात नुकसान झालंय. संजय कदम यांच्यासह कारमधील अन्य व्यक्ती सुखरूप आहेत.

भाजपचे माजी मंत्री डॉ.परिणय फुके यांच्या कारला भीषण अपघात

काही दिवसांपू्र्वी १७ एप्रिल रोजी भंडारा-गोंदिया जिल्ह्याचे माजी पालकमंत्री भाजप नेते डॉ. परिणय फुके यांच्या वाहनाचा देखील भीषण अपघात झाला होता. या अपघातात परिणय फुके थोडक्यात बचावले. तसेच काँग्रेस प्रदेशाध्यक्ष नाना पटोले यांच्या कारला देखील भीषण अपघात झाला होता.

राज्यात लोकसभा निवडणुकीची रणधुमाळी सुरू असताना नेत्यांच्या वाहनाला अपघात होण्याच्या घटना वाढतच आहेत. आज देखील संजय कदम प्रचार सभा उरकून घरी जात असताना त्यांच्या कारला अपघात झाला. त्यामुळे राजकीय वतृळात एकच खळबळ उडालीये.