रोहिदास गाडगे, शिरूर

शिरूरमध्ये जमिनीच्या वादातून दोन गटात तुंबळ हाणामारी झाल्याची घटना ताजी असतानाच आणखी एक अशीच धक्कादायक घटना समोर आली आहे. शेतजमिनीच्या वादातून महिलांना फरफटत नेत अमानुष मारहाण करण्यात आली. ही घटना शिरुर तालुक्यातील न्हावरा गावात घडली. या घटनेचा धक्कादायक व्हिडिओ समोर आला असून तो व्हायरल होत आहे.

मिळालेल्या माहितीनुसार, शिरुर तालुक्यातील न्हावरा गावात महिलांना अमानुष मारहाण करण्यात आली. शेतजमिनीच्या वादातून ही मारहाण झाली. पुरुष आणि महिलांकडून न्हावरे गावातील देशमुख कुटुंबामधील महिलांना फरफटत नेत अमानुष मारहाण केली. ऊस टिपरे, लाकडी काठीच्या सहाय्याने महिलांना मारहाण करण्यात आली. या घटनेमुळे शिरूरमध्ये खळबळ उडाली.

आरोपींकडून शिवीगाळ आणि जिवे मारण्याच्या धमक्या देण्यात आल्या. या मारहाणीमध्ये प्रियंका देशमुख, रूपाली देशमुख, मंदा देशमुख या महिला या मारहाणीत गंभीर जखमी झाल्या आहे. त्यांच्यावर रुग्णालयामध्ये उपचार सुरू आहेत. या प्रकरणी शिरूर पोलिस ठाण्यात गुन्हा दाखल करण्यात आला आहे. या घटनेमुळे गावात संतापाचे वातावरण आहे. आरोपींवर कठोर कारवाईची मागणी केली जात आहे.

याप्रकरणी पोलिस ठाण्यात तक्रार दाखल करण्यात आली होती. या तक्रारीनंतर त्रिंबक हिंगे, कमल हिंगे, साधना देशमुख, यशश्री हिंगे यांनी मारहाण केल्याप्रकरणी गुन्हा दाखल करण्यात आला. पुन्हा आमच्या नादाला लागतात तर चेंदामेंदा करुन टाकीण अशी देशमुख कुटुंबातील महिलांना धमकी देण्यात आली. या घटनेचा व्हिडिओ सध्या सोशल मीडियावर व्हायरल होत आहे. या प्रकरणाचा तपास पोलिसांकडून सुरू आहे.