Pune : पुणे हादरलं! विहिरीत उडी मारून महिलेने संपवलं जीवन; धक्कादायक कारण समोर

Pune Married Woman Sucide News पुण्यातून धक्कादायक घटना समोर आली आहे. हवेली तालुक्यातील कदमवाकवस्ती परिसरात कौटुंबिक वादातून एका २६ वर्षीय विवाहित महिलेने विहिरीत उडी मारून जीवन संपवल्याची घटना घडली आहे . या घटनेत महिलेचा मृत्यू झाला असून परिसरात हळहळ व्यक्त केली जात आहे. लोणी काळभोर पोलिसांनी या प्रकरणाचा तपास सुरू केला आहे.

मिळालेल्या माहितीनुसार, मृत महिलेच नाव स्वाती विजय कांबळे (वय २६) असे आहे. स्वातीचा कुटुंबियांसोबत किरकोळ कारणावरून वाद झाला होता. या वादानंतर ती मानसिकदृष्ट्या अस्वस्थ झाली होती. त्यानंतर ती घरातून बाहेर पडली आणि घराजवळच असलेल्या एका विहिरीत उडी मारून आपलं आयुष्य संपवलं असा प्राथमिक अंदाज पोलिसांनी व्यक्त केला आहे.

घटनेची माहिती मिळताच लोणी काळभोर पोलीस ठाण्याचे कर्मचारी तसेच बचाव पथक तातडीने घटनास्थळी दाखल झाले. स्थानिकांच्या मदतीने महिलेला विहिरीतून बाहेर काढण्यात आले. त्यानंतर तिला तात्काळ लोणी काळभोर येथील प्राथमिक आरोग्य केंद्रात उपचारासाठी नेण्यात आले.

मात्र, रुग्णालयात पोहोचण्यापूर्वीच तिचा मृत्यू झाल्याचे डॉक्टरांनी तपासणीनंतर स्पष्ट केले. या घटनेमुळे कुटुंबीयांवर दुःखाचा डोंगर कोसळला असून परिसरातही शोककळा पसरली आहे. दरम्यान पोलीस या घटनेचा पुढील तपास करत आहेत. याप्रकरणी आता पुढे काय कारवाई होणार हे पाहणं महत्त्वाचं ठरणार आहे.