• साताऱ्यात एकाच कुटुंबातील चौघांचा मृत्यू

• साताऱ्यातील फलटण तालुक्यातील खामगाव येथील घटना

• विजेचा धक्का लागून चौघांचा मृत्यू

• घरासमोरील विद्युत केबलच्या तारेला स्पर्श झाल्याने ही घटना घडली

ओंमकार कदम, सातारा

साताऱ्यातून भयंकर घटना समोर आली. विजेचा धक्का लागून एकाच कुटुंबातील चौघांचा दुर्दैवी मृत्यू झाला. साताऱ्याच्या फलटण तालुक्यातील खामगावात ही घटना घडली. घरासमोरील विद्युत केबलच्या तारेला स्पर्श होऊन सर्वांचा मृत्यू झाला. एकमेकांना वाचवण्याच्या प्रयत्नात ही घटना घडली. मृतांमध्ये दोन महिला आणि दोन पुरूषांचा समावेश आहे. या घटनेमुळे साताऱ्यात खळबळ उडाली आहे. फलटण पोलिसांनी घटनास्थळी धाव घेतली असून तपास सुरू केला आहे.

मिळालेल्या माहितीनुसार, खामगाव येथील एका खासगी इंग्रजी माध्यमाच्या शाळेजवळ राहणारे शिंदे कुटुंब बुधवारी पहाटे नेहमीप्रमाणे उठून घराबाहेर आले होते. सकाळी साडेपाच ते सहा वाजण्याच्या सुमारास घराबाहेरील विद्युत तारेमध्ये अचानक वीज प्रवाह उतरल्याने पिसुरड्या किसन शिंदे (वय ४८) यांना विजेचा जोरदार झटका बसला. त्यांना वाचविण्यासाठी कुटुंबातील इतर सदस्य धावून गेले.

गंगुबाई पिसुरड्या शिंदे (वय ४६), सचिन पिसुरड्या शिंदे (वय २६) आणि आरती पिसुरड्या शिंदे (वय २२) यांनी पुसुरड्याला वाचवण्यासाठी तातडीने धाव घेतली. मात्र, दुर्दैवाने विद्युत प्रवाहाची तीव्रता इतकी जास्त होती की, वाचविण्यास गेलेले तिघेही जण एकापाठोपाठ एक त्या प्रवाहाच्या संपर्कात आले आणि काही क्षणांतच चौघांचाही जागीच मृत्यू झाला.

या धक्कादायक घटनेची माहिती मिळताच ग्रामस्थांनी घटनास्थळी प्रचंड गर्दी केली. फलटण ग्रामीण पोलिस ठाण्याचे पोलिस निरीक्षक राजकुमार भुजबळ यांच्या मार्गदर्शनाखाली पोलिस पथक तातडीने घटनास्थळी दाखल झाले. पोलिसांनी घटनेचा सविस्तर पंचनामा करून मृतदेह शवविच्छेदनासाठी फलटण उपजिल्हा रुग्णालयात पाठवून दिले आहेत. हे सदरची घटना नेमकी कशामुळे घडली याचा तपास पोलीस प्रशासनाकडून करण्यात येत आहे. एकाच घरातील चार व्यक्ती काळाच्या पडद्याआड गेल्याने शिंदे कुटुंबावर दुःखाचा डोंगर कोसळला आहे.