सांगली : सांगली (sangli) पोलीस मुख्यालयातील ट्राफिक गार्डन मधून चंदनाची झाडे कापून नेल्याप्रकरणी पाेलीसांनी दाेघांना अटक (arrest) केली आहे. अभिमन्यू आनंद चंदनवाले आणि रमेश भीमराव चंदनवाले अशी अटक केलेल्यांची नावे असल्याची माहिती स्थानिक गुन्हे अन्वेषणच्या (lcb) पथकाने दिली. (sangli latest marathi news)

सांगली येथील वाणलेसवाडी येथे दोघेजण चंदन विक्रीसाठी आले असताना ही कारवाई करण्यात आली आहे. पोलीस मुख्यालयाच्या आवारातील गार्डनमध्ये (ता. 15 जुलैला) पहाटेच्या सुमारास दोघांनी चंदनाची झाडे कापून नेली होती. सकाळी हा प्रकार निदर्शनास आल्यानंतर पोलीस कर्मचारी दीपक वडेर यांनी विश्रामबाग पोलीस ठाण्यात तक्रार दिली होती.

मुख्यालयाच्या आवारातून चंदनाची झाडे चोरीस गेल्यामुळे सर्वत्र खळबळ उडाली होती. पोलीस अधीक्षक दीक्षित गेडाम (dixit gedam) यांनी गुन्हे अन्वेषणसह विश्रामबाग पोलिसांना तात्काळ छडा लावण्याचे आदेश दिले होते.

विश्रामबाग पोलीस आणि स्थानिक गुन्हे अन्वेषण या चोरट्यांच्या मागावर होते. वाणलेसवाडी येथे चंदनाची तुकडे विक्री करण्यासाठी दोघेजण आल्याची माहिती पथकाला मिळाली. पथकाने तात्काळ तेथे जाऊन संशयास्पद फिरणा-या दाेघांना ताब्यात घेतले..

या दाेघांकडून चार हजार किमतीचे तीन किलो 138 ग्रॅम वजनाचे चंदनाचे तुकडे मिळाले. दोघांची चौकशी केली असता पोलीस मुख्यालयाच्या आवारातून चंदनाची झाडे तोडून विक्री केल्याचे कबुली त्यांनी दिली आहे.

Edited By : Siddharth Latkar