सांगली : मुलींच्या छेडखानीचे प्रकार सुरूच असून शाळेत शिकणाऱ्या विद्यार्थिनीवर शिक्षकाकडून अत्याचार करण्यात आल्याच्या घटना समोर आल्या आहेत. यातच सांगलीच्या जत येथील आश्रम शाळेतील मुख्याध्यापकाने एका अल्पवयीन विद्यार्थिनीचा विनयभंग केल्याचा धक्कादायक प्रकार घडला आहे. सदर प्रकाराने खळबळ उडाली असून मुख्याध्यापकास ताब्यात घेण्यात आले आहे. 

सांगली जिल्ह्यातील जतमधील सनमडी येथील असणाऱ्या नामांकित आश्रम शाळेमध्ये हा प्रकार घडला आहे. विनोद जगधने असे या अटक करण्यात आलेल्या मुख्याध्यापकाचे नाव आहे. दरम्यान १८ एप्रिलला सन्मडी मधल्या आश्रम शाळेत मुख्याध्यापक असणाऱ्या विरोध जगधने याने विद्यार्थिनीचा विनयभंग करण्यात आल्याचा प्रकार घडला होता, तसेच संबंधित मुख्याध्यापकाकडून पीडित अल्पवयीन मुलीला सदर प्रकार कोणास सांगितल्यास जीवे मारण्याची धमकी देण्यात आली होती. 

पालकांकडून मुख्याध्यापकास मारहाण 

दरम्यान आश्रम शाळेला सुट्टी लागल्यानंतर पीडित मुलीने घरी आल्यावर घडल्या प्रकाराबाबत आपल्या पालकांना माहिती दिली. त्यानंतर संतप्त झालेल्या पालकांनी आश्रम शाळेतल्या मुख्याध्यापकाला जाब विचारत बेदम मारहाण देखील केली होती. यानंतर हा सर्व प्रकार समोर आला होता. मात्र नामांकित आश्रम शाळा असल्याने सदरचे प्रकरण दडपण्याचा प्रयत्न करण्यात आला होता. 

मुख्याध्यापकास अटक 

मात्र काही पालकांनी याबाबत आवाज उठवल्यानंतर इतर मागास बहुजन कल्याण विभागाकडून आश्रमशाळेत चौकशी करण्यात आली. अखेर या प्रकरणात मुख्याध्यापकाच्या विरोधात पोक्सो अंतर्गत गुन्हा दाखल करण्यात आला असून मुख्याध्यापक विनोद जगधने याला अटक देखील करण्यात आली आहे. नरदन मुख्याध्यापकाकडून आणखी मुलींचे लैंगिक शोषण केल्याचा संशय पोलिसांच्याकडून व्यक्त करण्यात आला असून याबाबत तक्रार देण्याचं आवाहन उमदी पोलिसांच्याकडून करण्यात आला आहे.