रामू ढाकणे, संभाजीनगर

सोशल मीडियाच्या माध्यमातून तरुण-तरुणींची फसवणूक केल्याच्या अनेक घटना वारंवार समोर येत आहेत. सोशल मीडियाच्या माध्यमातून फसवणूक करत छत्रपती संभाजीनगरमध्ये एका विवाहित महिलेला तब्बल १७ लाखांचा गंडा घातल्याची घटना घडली आहे. या महिलेला परदेशी तरुणासोबतची मैत्री महागात पडली आहे. महागड्या वस्तू गिफ्ट देण्याचे आमिष दाखवत ही फसवणूक करण्यात आली आहे. याप्रकरणी पीडित महिलेच्या तक्रारीवरून पुंडलिक नगर पोलिस ठाण्यात गुन्हा दाखल करण्यात आला आहे.

मिळालेल्या माहितीनुसार, इंग्लंडचा असल्याचे सांगून एका तोतयाने संभाजीनगरमध्ये राहणाऱ्या एका महिलेची लाखो रुपयांची फसवणूक केली आहे. संभाजीनगर शहरातील एका ३१ वर्षीय विवाहित महिलेसोबत फेसबुकवर मैत्री करून तिला तब्बल १७ लाख ६९ हजार रुपयांचा गंडा घातण्यात आल्याची धक्कादायक घटना घडली आहे. या घटनेमुळे एकच खळबळ उडाली आहे.

आपली फसवणूक झाल्याचे लक्षात येताच पीडित महिलेने पुंडलिक नगर पोलिस ठाण्यात धाव घेत तक्रार दाखल केली. याप्रकरणी पोलिसांनी गुन्हा दाखल करत तपास सुरू केला आहे. ही उच्चशिक्षित महिला सध्या एका समाज कल्याण विभागाच्या आश्रम शाळेच्या वस्तीगृहाची अधीक्षक आहे. ऑगस्ट २०२३ मध्ये ही महिला आणि परदेशी तरुणासोबत मैत्री झाली होती. त्यानंतर या तरुणाने महिलेचा विश्वास जिंकला आणि तिला सोने चांदीच्या भेटवस्तू पाठवण्याचे नाटक करून १७ लाख ६९ हजार रुपये उकळले.