Summary -

• संभाजीनगरमध्ये भीषण रस्ते अपघात

• उभ्या ट्रकला दुचाकीची जोरदार धडक

• दोन जणांचा जागीच मृत्यू

• कामावरून घरी जात असताना हा अपघात झाला

माधव सावरगावे, संभाजीनगर

छत्रपती संभाजीनगरमध्ये भीषण अपघातामध्ये दोघांचा जागीच मृत्यू झाला. छत्रपती संभाजीनगर महामार्गांवरील सिल्लोड तालुक्यातील चिंचखेडा येथे ही घटना घडली. रस्त्यावर उभ्या ट्रकला पाठी मागून दुचाकीने जोरदार धडक दिली. या अपघातामध्ये दोन जण गंभीर जखमी झाले. जास्त रक्तस्राव झाल्याने दोघांचाही जागीच मृत्यू झाला. हे दोघेजण निल्लोड येथील रहिवासी होते. त्यांच्या मृत्यूमुळे गावावर शोककळा पसरली.

मिळालेल्या माहितीनुसार, निल्लोड येथे राहणारे कैलास सखाराम मगर (४५ वर्षे) आणि संजय बारीकराव खटाळ (३५ वर्षे) यांचा अपघातामध्ये मृत्यू झाला. दोघेही माणिकनगर येथील हॉटेल गुरु बिअर अँड बारमध्ये कामाला होते. दोघेही सोमवारी रात्री उशिरा हॉटेल बंद करून निल्लोड येथील आपल्या घराच्या दिशेने जात होते. त्याचवेळी छत्रपती संभाजीनगर महामार्गांवरील चिंचखेडा येथील हॉटेल प्रीतीच्या समोर भीषण अपघात झाला.

पीव्हीसी पाईपने भरलेला ट्रक प्रीती हॉटेलसमोर उभा होता. या ट्रकला कैलास यांच्या दुचाकीने पाठीमागून जोरदार धडक दिली. हा अपघात इतका भीषण होता की यामध्ये दोघेही गंभीर जखमी झाले. रक्ताच्या थारोळ्यात पडलेल्या कैलास आणि संजय या दोघांना स्थानिक नागरिकांनी तात्काळ उपचारासाठी सिल्लोड उपजिल्हा रुग्णालयात नेले. पण डॉक्टरांनी दोघांना तपासून मृत घोषीत केले.

ट्रक रस्त्याच्या कडेला उभा करून चालक टायरमधील हवा चेक करत होता. कैलास आणि संजय यांना ट्रक उभा असल्याचा अंदाज आला नाही त्यामुळे त्याची दुचाकी थेट ट्रकला जाऊन धडकली. या अपघातानंतर त्यांच्यावर निल्लोड गावात अंत्यसंस्कार करण्यात आले. या घटनेने निल्लोड गावावर शोककळा पसरली आहे. या घटनेमुळे या गावात दिवसभर चूल पेटली नाही. या घटनेची वडोदबाजार पोलिस ठाण्यात नोंद झाली असून पुढील तपास पोलिस करत आहेत.