Bus Accident News : एक्स्प्रेस वेवर मृत्यूचं तांडव! ५० प्रवाशांना घेऊन जाणारी डबल डेकर बस उलटली

नेपाळ येथील काठमांडू मधील बस अपघाताची घटना ताजी असतानाच उत्तर प्रदेशातील लखनऊमध्ये ४० ते ५० जणांना घेऊन बिहारला जाणाऱ्या स्लीपर कोच बसचा भीषण अपघात झाला आहे. या दुर्घटनेत ७ जणांचा मृत्यू झाला असून ४० जण गंभीर जखमी झाले आहेत. घटनास्थळी पोलीस दाखल झाले असून बचाव कार्य सुरु आहे. जखमींना जवळच्या रुग्णालयात दाखल करण्यात आले आहे. तसेच पोलीस तपास सुरु आहे.

मिळालेल्या माहितीनुसार, ही बस पानीपतहून प्रवाशांना घेऊन बिहारमधील अरहरियाला जात होती. पूर्वांचल एक्सप्रेसवेवर आल्यानंतर भरधाव वेगात जाणाऱ्या स्लीपर बसच्या चालकाचे बसवरचे नियंत्रण सुटले आणि ती उलटली. या भीषण अपघातानंतर परिसरात आणि बसमधील प्रवाशांमध्ये गोंधळ उडाला.

घटनेची माहिती मिळताच घटनास्थळी पोहोचलेल्या पोलिसांनी बसमध्ये अडकलेल्या लोकांना शर्थीच्या प्रयत्नानंतर बाहेर काढले. आतापर्यंत या अपघातात सात जणांचा मृत्यू झाल्याचे वृत्त असून ४० हून अधिक जण जखमी असल्याचे सांगण्यात येत आहे. गंभीर जखमींना सीएचसी गोसाईगंज येथून केजीएमयू ट्रॉमा सेंटरमध्ये रेफर करण्यात आले.

घटनास्थळी पोलिस दल पोहचले असून बचाव कार्य सुरु करण्यात आले आहे. पोलीस या घटनेचा तपास करत असून नेमकी ही घटना कशामुळे घडली याचा तपास करत आहेत. या घटनेने प्रवाशांमध्ये भीतीचे वातावरण पसरले असून मृतांच्या कुटुंबियांवर दुःखाचा डोंगर कोसळला आहे.