Sangli News : सांगलीतील राष्ट्रवादीचा कार्यकर्ता नालसाब मुल्ला (nalsab mulla) खून प्रकरणी मुख्य सूत्रधाराला पाेलिसांनी अटक केली. मोका न्यायालयाच्या परवानगीने पोलिसांनी कळंबा कारागृहातून सचिन डाेंगरे यास ताब्यात घेतले. सच्याने खूनाचा कळंब्यातूनच कट रचला हाेता आता त्याला मोबाईल पुरविणारे पोलिसांच्या रडारवर आहेत. (Maharashtra News)

सांगलीतील राष्ट्रवादी कॉंग्रेसचा कार्यकर्ता नालसाब मुल्लाचा गोळ्या झाडून व कोयत्याने सपासप वार करून निर्घृण खून करण्यात आला होता. या खून प्रकरणातील मुख्य सूत्रधार सच्या उर्फ सचिन डोंगरे याला विश्रामबाग पोलिसांनी कळंबा कारागृहातून अटक केली.

सचिन डोंगरे याने कळंबा कारागृहातून 22 मोबाईल कॉल करून खुनाची सूत्रे हलविल्याचे पोलिस तपासात निष्पन्न झाले. दरम्यान नालसाबचा खून करण्यासाठी सच्या डोंगरने कळंबा कारागृहात कट रचल्याचे स्पष्ट झाले आहे. सचिन डोंगरेला 2 जुलैपर्यंत पोलिस कोठडी ठोठाविण्यात आली आहे.

सचिनने एकच नंबर वेगवेगळ्या चार मोबाईलमध्ये वापरल्याचे तपासात समोर आले आहे. त्याला कळंब्यात मोबाईल पुरविणारे गुन्हेगार देखील आता पोलिसांच्या रडारवर आले आहेत. सचिन डोंगरे हा यापूर्वीच्या खून प्रकरणात आणि मोका अंतर्गत केलेल्या कारवाईमुळे कळंबा कारागृहात होता. तो मोकातून बाहेर येवू नये यासाठी नालसाब मुल्ला हा प्रयत्न करीत असल्यानेच सच्या डोंगरने सुपारी देवून त्याचा काटा काढला.

त्याला कारागृहात मोबाईल कोणी पुरविले याचा देखील पोलिस तपास करीत आहेत. या खून प्रकरणी पोलिसांनी यापूर्वी सनी कुरणे, विशाल कोळपे, स्वप्निल मलमे, रोहित मंडले, प्रशांत उर्फ बबलू चव्हाण, ऋत्विक माने या संशयितांना अटक करण्यात आली आहे.

Edited By : Siddharth Latkar