Raigad News: पावसाळ्यामध्ये रायगड किल्ल्यावर (Raigad Fort) ट्रेकिंगसाठी जाणाऱ्या पर्यटकांसाठी आणि शिवप्रेमींसाठी (Shiv Lovers) महत्वाची बातमी आहे. रायगड किल्ल्यावर जाणारी पायवाट बंद करण्यात आली आहे. पायरी मार्गावर सतत दरड कोसळण्याच्या घटना घडत असल्यामुळे पोलीस प्रशासनाने (Raigad Police) हा मोठा निर्णय घेतला आहे. या निर्णयामुळे शिवप्रेमी आणि पर्यटक नाराज झाले आहेत.

मिळालेल्या माहितीनुसार, रायगड किल्ल्याचा पायरी मार्ग 31 ऑगस्टपर्यंत पर्यटक आणि शिवप्रेमींसाठी बंद राहणार आहे. गेल्या काही दिवसांपासून रायगड किल्ल्याच्या दिशेने जाणाऱ्या मार्गावर सतत दरड कोसळण्याच्या घटना घडत आहे. त्यामुळे भविष्यात कोणतीही मोठी दुर्घटना होऊ नये यासाठी पोलीस प्रशासनाने हा मार्ग बंद करण्याचा निर्णय घेतला आहे.

रायगड किल्ल्यावर जाणाऱ्या मुख्य रस्त्यापासून ते महादरवाजापर्यंतच्या पायरी मार्गावर सतत दरड कोसळण्याच्या दुर्घटना घडत आहेत. त्यामुळे आता किल्ल्याच्या दिशेने जाणारा पायी मार्गच बंद राहणार आहे. रायगड किल्ल्यावर जाणारा पायरी मार्ग बंद करण्यात आला असला तरी किल्ल्यावर जाण्यासाठी रोप वेची सुविधा सुरु राहणार आहे. त्यामुळे पर्यटक आणि शिवप्रेमींना काहीसा दिलासा मिळाला आहे.

दरम्यान, 13 जून रोजीच रायगड किल्ल्याजवळ दरड कोसळल्याची घटना घडली होती. रस्त्यावरुन जाणाऱ्या वाहनांवर ही भली मोठी दरड कोसळली होती. या घटनेत सुदैवाने जीवितहानी झाली नाही पण वाहनांचे प्रचंड नुकसान झाले होते. रायगड किल्ल्याजवळील चित्त दरवाजाजवळ ही दरड कोसळली होती. यामध्ये तीन वाहनांचे नुकसान झाले होते. तर काही दिवसांपूर्वी किल्ले रायगडवर दरड कोसळून एका व्यक्तीचा मृत्यू झाल्याची घटना घडली होती.